واشنگٹن(این این آئی )امریکا میں تین 3 امریکی فوجی شعبے سینیٹ کی طرف سے منظوری نہ ملنے کی وجہ سے سربراہوں کے بغیر چل رہے ہیں کیونکہ ریپبلکن سینیٹر ٹومی ٹوبر ویل نے پینٹاگان کی اسقاط حمل کی نئی پالیسی کے خلاف احتجاج کرتے ہوئے 300 سے زائد اعلی فوجی افسران کی تقرری کو معطل کر دیا۔
غیرملکی خبررساں ادارے کے مطابق امریکی تاریخ میں یہ اپنی نوعیت کی پہلی اور منفرد مثال ہے جس میں تین امریکی فوجی شعبے قیادت کے بغیر چل رہے ہیں۔نیول آپریشنز کے سربراہ جنرل مائیک گلڈے نے اپنے عہدے سے استعفی دے دیا، بحریہ، فوج اور میرین کور بھی سربراہوں کے بغیر قائم مقام سربراہوں کے ساتھ کام کررہے ہیں۔
ڈیفنس سکریٹری لائیڈ آسٹن نے ان معطلیوں پر تنقید کی کیونکہ تعطل کا یہ عمل پانچوین مہینے میں داخل ہوگیا ہے اور کوئی حل نظر نہیں آرہا ہے۔آسٹن نے ایک انٹرویو کے دوران کہا کہ اس مکمل معطلی کی وجہ سے محکمہ دفاع کی تاریخ میں پہلی بار ہمارے تین فوجی کمانڈزیونٹ سینیٹ سے تصدیق شدہ کمانڈروں کے بغیر کام کر رہے ہیں۔ یہ غیر مسبوق ، غیر ضروری اور غیر محفوظ ہے اور اس سے امریکہ کی فوجی تیاری کو نقصان پہنچ سکتا ہے۔
