لاہور( این این آئی) سابق وزیر داخلہ شیخ رشید احمد نے کہا ہے کہ اگست کا پہلا ہفتہ ہی بہت اہم ہوگا اور سیاست کا رخ پتہ چل جائے گا ،ان کی گوٹی پھنس گئی ہے اور یہ گوٹی ایسی پھنسی ہے کہ ان کو لینے کے دینے پڑ سکتے ہیں، 15 مہینوں میں انہوں نے ایک تنکا نہیں توڑا اس آخری ہفتے میں کون سی تلواریں چلا لیں گے ،
بھائی کو سفارتی پاسپورٹ دلوانے کے باوجود 15 مہینے میں نہیں لا سکے اب خدا کو معلوم ہے نواز شریف کس حال میں آئے گا کب آئے گا اور کیا سیاست کر پائے گا۔ ٹوئٹر پر جاری اپنے بیان میں شیخ رشید نے کہا کہ اسحاق ڈار کو جس تیزی سے لانچ کیا تھا وہ ٹریلر ہی چلا اور فلم سنسر بورڈ نے پاس نہیں کی ،اب یہ پانچ آدمیوں کے نام جو دے رہے ہیں یہ پانچ آدمیوں کے نام اتنی آسانی سے سینسر بورڈ میں پاس نہیں ہوں گے ،
راجہ ریاض بھی اپنا کام ڈال سکتا ہے ،اگست میں 85 رکنی کابینہ اور ان کے حکمران اپنے سائز اور اوقات میں آ چکے ہوں گے ،ستمبر ستمگر ہوگا ںسیاسی پارٹیاں جو توڑ پھوڑ کے عمل سے دوچار ہونے والی ہیں وہ کسی نتیجے پرنہیں پہنچ سکیں گی ،آخری ہفتے میں شہباز شریف نے افتتاحوں کا جمعہ بازار لگایا ہے ،دن میں ایک درجن سے زائد افتتاح کرکے کارکردگی کی فوٹو گرافی کی جا رہی ہے ،نہ پیسے ہیں نہ وقت ہے اور نہ لوگ بے وقوف ہیں ،نہ 9 من تیل ہوگا نہ رادھا ناچے گی ،
اب لوگوں کو شعور آ چکا ہے ان کو پتا ہے کہ حقیقت کیا ہے اور دکھاوا کیاہے ۔ انہوں نے کہا کہ یہ 51 ارب یا 60 ارب کی بجائے 100 ارب روپے بھی ممبروں کو بانٹ دیں اب لوگ عزت نفس اصول سچائی اور حقیقت کو ووٹ دیں گے ،چور بازاری اور دکھاوے کو کوئی ووٹ نہیں ملیں گے ،سیاسی شکست اور سیاسی قبرستان ان کا مقدر ہو گا ،جو لوگ یہ سمجھتے ہیں کہ عوام بے وقوف ہے وہ خود بہت بڑے بیوقوف ہیں ،عوام کو سب سمجھ ہے ،
جو مایوسی اس پی ڈی ایم کو ملنے والی ہے اس کا پی ڈی ایم کو اندازہ ہے ،15 مہینے میں جو چادر اور چاردیواری کو نیست و نابود کیا گیا ہے لوگوں کے گھروں میں بغیر وارنٹ بغیر کسی کیس کے داخل ہو کر توڑ پھوڑکے ساتھ خواتین کی بے حرمتی کی گئی ،حاملہ عورتوں کی گرفتاریوں اور بچوں کو لاپتہ کرنے کے ساتھ پولیس نے جو رویہ رکھا ہے وہ انتہائی قابل مذمت ہے ،ان تمام لوگوں کو قانون کے کٹہرے میں ثبوت کے ساتھ لایا جائے گا ، خدا کے ہاں دیر ہے اندھیر نہیں ہے ،انشا اللہ اگر اللہ کو منظور ہوا اور میں زندہ رہا تو 13 اگست کی رات 10 بجے جشن آزادی لال حویلی کے باہر اسی جوش و خروش کے ساتھ منایا جائے گا اور 12 بجکر 1 منٹ پر شاندار آتش بازی کا مظاہرہ ہو گا۔
