کراچی(این این آئی)حکومتی اتحاد پاکستان ڈیموکرٹیک موومنٹ کے سربراہ اور جے یو آئی ف کے امیر مولانا فضل الرحمن نے کہاہے کہ مغربی ممالک دہشتگردی کے نام پرمذہب کاگراف نیچے لانے میں ناکام رہے،کوئی اشتعال کا پیغام ہم نے نہیں دیا جس سے وہ سازش میں ناکام ہوگئے،سوال ہی پیدا نہیں ہوتا ہم کسی بھی آسمانی کتاب کی بے حرمتی کریں۔
کراچی میں مولانافضل الرحمان نے پیرصدرالدین شاہ سیانکی رہائش گاہ پرملاقات کی،ملاقات میں ڈاکٹرذوالفقارمرزااورفہمیدہ مرزا بھی شریک تھے۔ملاقات کے بعد مولانافضل الرحمن نے گفتگو کرتے ہوئے کہاکہ عالمی سطح پر پاکستان کو بلیک میل کیا جارہاہے،مغربی قوتیں چین کی سرمایہ کاری روکنے کیلئے بلیک میل کررہی ہیں جس میں آئی ایم ایف نے فرنٹ مین کا کردار ادا کیا ہے۔
انہوں نے کہاکہ زرمبادلہ کے ذخائر تیزی سے بہتر ہورہے ہیں،اسٹیٹ بینک اوردیگراداروں کوآئی ایم ایف میں گروی رکھاگیا،ملک میں میگا پراجیکٹس دوبارہ شروع ہوگئے ہیں۔انہوں نے کہاکہ نوازشریف نے وطن واپسی کا فیصلہ خود کرنا ہے،یہ ان کا اپنا وطن ہے جب وہ آئیں گے عوام ویلکم کریں گے،الیکشن وقت پر ہوتے دکھائی دے رہے ہیں،سیاسی صورتحال میں مشاورت کاسلسلہ جاری رہناچاہیے،تجویزہوں یاتجاویزجب اتفاق ہوجائے توسب کوپتہ چل جائیگانگراں سیٹ اپ بنتا ہی اسی لئے ہے کہ وہ الیکشن کرائے۔
انہوں نے کہا کہ چیئرمین پی ٹی آئی کا قصہ تمام ہوچکا ہے،چیئرمین پی ٹی آئی کی بات نہ کی جائے تواچھا ہوگا۔مولانا فضل الرحمن نے کہا کہ اضلاع کی ذیلی تنظیموں کو فائدہ نظرآئے گاتووہ سیٹ ایڈجسٹمنٹ کرسکتی ہیں،بطورپی ڈی ایم سربراہ قوم سے کچھ نہیں چھپایاتھا،سی پیک منصوبے کی شکل میں چائنہ کیساتھ قرب اختیار کیاہے۔اس موقع پر پیرصدر الدین شاہ نے کہاکہ مولانافضل الرحمان کی آمد پر ان کا مشکور ہوں، انہوں نے کہا کہ کچھ تجاویز مولانافضل الرحمان نے دیں،کچھ ہم نے دیں،سیاسی انداز میں سسٹم کوایسے چلانا چاہتے ہیں کہ کسی کواعتراض نہ ہو۔
