لاہور ( این این آئی) سابق وزیراعظم و قائد پاکستان مسلم لیگ (ن) محمد نواز شریف کے چند ہفتے لندن میں قیام کے بعد پاکستان واپسی کا امکان ہے۔پارٹی ذرائع کے مطابق 25 جولائی کو نواز شریف کی لندن روانگی کے بعد مریم نواز پاکستان آجائیں گی، جنہیں پارٹی عہدیداروں کی جانب سے پارٹی قائد کے استقبال کی تیاریوں کے حوالے سے بریفنگ دی جائے گی۔

ذرائع کا کہنا ہے کہ قومی و صوبائی ٹکٹ ہولڈرز کے علاوہ ڈویژنل، ضلعی عہدیداروں اور یونین کونسل کی سطح پر بھی نواز شریف کے استقبال کی تیاریوں کی ہدایات کر دی گئی ہے۔پارٹی ذرائع کا بتانا ہے کہ (ن) لیگ کسی بھی وقت نواز شریف کی وطن واپسی کا اعلان کر سکتی ہے۔واضح رہے کہ وفاقی وزیر قانون اعظم نذیر تارڑ کہہ چکے ہیں کہ الیکشن ایکٹ میں ترمیم کے بعد نواز شریف کی وطن واپسی کی راہ ہموار ہو چکی ہے۔