لاہور(این این آئی)پاکستان ویمن کرکٹ ٹیم کی نوجوان بیٹر عائشہ نسیم نے کرکٹ سے علیحدگی کا فیصلہ برقرار رکھا، پاکستان کرکٹ بورڈ (پی سی بی) کی کوشش تھی کہ جارح مزاج کرکٹر فیصلہ واپس لے لیں تاہم پی سی بی کی کوششیں کامیاب نہ ہوسکیں۔ذرائع نے بتایا کہ عائشہ نسیم نے کچھ عرصہ قبل پاکستان کرکٹ بورڈ کو آگاہ کیا تھا کہ وہ مزید نہیں کھیلنا چاہتیں،
یہ ان دنوں کی بات ہے جب وہ انجری کا شکار تھیں تاہم پی سی بی نے اس موقع پر فیصلے کو جذباتی جان کر انہیں سمجھانے کی کوشش کی،پاکستان ویمن ٹیم کی ایک سینئر پلیئر کو بھی عائشہ سے بات کرنے کو کہا گیا تھا۔ذرائع کے مطابق پی سی بی سینٹرل کنٹریکٹ پر فیصلے تک عائشہ کے جواب کا انتظار کرنا چاہتا ہے تاہم عائشہ نسیم اب تک اپنے فیصلے پر قائم ہیں۔
ذرائع کے مطابق عائشہ نے کسی موقع پر پاکستان کرکٹ بورڈ کو اتنی جلد ریٹائرمنٹ کے فیصلے کی وجوہات سے آگاہ نہیں کیا۔2020 میں پاکستان کی جانب سے ڈیبیو کرنیوالی عائشہ نے اب تک چار ون ڈے اور 30 ٹی ٹوئنٹی میچز میں پاکستان کی نمائندگی کی ہے۔
