لاہور (صباح نیوز)وفاقی وزیر اطلاعات مریم اورنگزیب نے کہا ہے کہ نوازشریف سے سیاسی انتقام لیاگیا عدلیہ کو خود فیصلہ کرنا چاہیے، ایک خاص گروہ سوشل میڈیا کے ذریعے نفرت پھیلا رہا ہے،پی ٹی آئی نے اپنے دور حکومت میں تمام اداروں کو بری طرح تباہ کیا، ملک میں چار سال نفرت کے بیج بوئے گئے،وزیراعظم نے ہدایت کی ہے کہ سوشل میڈیا پر آرمی چیف کیخلاف مہم چلانے والے عناصر سے نمٹا جائے۔
ریڈیو پاکستان کے مختلف منصوبوں کی افتتاحی تقریب سے خطاب کرتے ہوئے مریم اورنگزیب نے کہاکہ نوجوانوں کو مثبت ذرائع ابلاغ کی ضرورت ہے، ریڈیو اور دیگر ذرائع ابلاغ قومی ورثہ اور وقت کی اشد ضرورت ہیں، سکرین کی سیاحت کے ذریعے پاکستان کا مثبت بیانیہ اجاگر ہوگا۔وفاقی وزیر نے کہا کہ سینما ہاؤسز کا مقصد نوجوانوں کو سستی تفریح فراہم کرناہے، ملک کے چھوٹے بڑے شہروں میں سینما اور تھیٹرز بنائے جائیں گے،نئی پالیسی کے تحت نوجوانوں کو فلم سازی کے میدان میں مواقع ملیں گے۔
انہوں نے کہا کہ پی ٹی آئی نے اپنے دورِ حکومت میں تمام اداروں کو بری طرح تباہ کیا۔ 4سال ملک میں نفرت کے بیج بوئے گئے۔ پی ٹی وی پر حملہ کرنے والوں نے ریڈیوپاکستان پر 3 روز حملہ کیا۔ سکیورٹی گارڈز کو حملے میں لاٹھیوں سے مارا۔انہوں نے کہا کہ ایک خاص گروہ سوشل میڈیا کے ذریعے نفرت پھیلا رہا ہے۔ وزیراعظم شہبازشریف نے لیپ ٹاپ تقسیم کیے، اس کا مقصد ہے کہ بچوں کے ہاتھ میں لیپ ٹاپ ہو نہ کہ پیٹرول بم۔ آئندہ وقت پاکستان کو جوڑنے کا وقت ہے۔
سیاسی جماعتوں کو ایک لڑی میں پرو دیا ہے۔ ایک گروہ کی سرگرمی پاکستان کی ترجمانی نہ کرے۔مریم اورنگزیب کا کہنا تھا کہ نوازشریف کے ذریعے سی پیک آیا تو سب سے بڑا حصہ روڈ نیٹ ورک، ون بیلٹ ون روڈ اور کلچر و ثقافت اہم تھا۔ آنے والے وقت میں پرائیویٹ سیکٹر اپنا حصہ ڈالے، نوجوانوں کی تربیت کرے، حکومت پلیٹ فارم مہیا کرے گی۔وفاقی وزیر اطلاعات نے کہا کہ ائرپورٹس دنیا بھر میں پبلک پرائیویٹ پارٹنر شپ سے چلتے ہیں۔ ہیتھرو ائرپورٹ بھی آؤٹ سورس ہے، کوئی چیز پاکستان کی فروخت نہیں ہو رہی۔
حکومت کی مدت آئینی وقت پر پوری ہوگی۔ نوازشریف سے سیاسی انتقام لیاگیا عدلیہ کو خود فیصلہ کرنا چاہیے۔ نوازشریف جلد واپس آئیں گے۔انہوں نے مزید کہا کہ انسانی سمگلنگ میں جو بھی ملوث ہوگا قانون سازی کے تحت روک تھام کریں گے۔ وزیراعظم جلد ہی اس سلسلے میں اہم اعلان کریں گے۔ چہرے کسی سے چھپے نہیں، جنہوں نے امپورٹڈ حکومت کے نعرے لگائے، وہ امریکا کے گھٹنوں میں بیٹھ گئے۔ آرمی چیف کے قتل سے متعلق سوشل میڈیا مہم کی شدید مذمت کرتی ہوں، ایسی مہم سے کوئی فرق نہیں پڑتا۔ وزیر اعظم نے ہدایت کی ہے کہ ایسے عناصر سے نمٹا جائے جو آرمی چیف کے خلاف مہم میں شامل ہیں۔
