راولپنڈی(این این آئی)وزیر اعظم شہباز شریف نے پاکستان اور بھارت کے درمیان ہونے والی حالیہ کشیدگی کے دوران 6بھارتی جنگی طیارے مار گرانے کی تصدیق کر دی۔آئی ایس پی آرکی جانب سے جاری بیان کے مطابق وزیراعظم نے کامرہ میں پاک فضائیہ کے آپریشنل بیس کا دورہ کیا۔دورے کے دوران وزیراعظم کو پاک فضائیہ کی آپریشنل تیاریوں اور جنگی صلاحیتوں پر بریفنگ دی گئی جبکہ شہباز شریف نے پاک فضائیہ کے پائلٹ، انجینئرز اور تکنیکی عملہ سے بات چیت کی اور ملکی دفاع کیلئے پاک فضائیہ کی پیشہ ورانہ مہارت اور ثابت قدمی کی تعریف کی۔آئی ایس پی آر کے مطابق اس موقع پر بات چیت کرتے ہوئے وزیر اعظم شہباز شریف نے کہا کہ بلااشتعال جارحیت کے جواب میں مسلح افواج نے مثالی تحمل کا مظاہرہ کیا اور پاک فضائیہ نے بھرپور جوابی کارروائی میں دشمن کے فوجی انفرااسٹرکچر کو فیصلہ کن دھچکا پہنچایا۔اس موقع پر وزیراعظم کی جانب سے 6اور 7مئی کی درمیانی شب چھٹے بھارتی میراج طیارے کو گرانے کی بھی تصدیق کی گئی۔پاک فضائیہ کی جانب سے گرائے گئے بھارتی جنگی جہازوں میں 3رافیل طیارے شامل ہیں جبکہ بھارت کا 1سخوئی 30، 1مگ 29اور 1میراج 2000طیارہ بھی گرایا گیا۔پاکستانی افواج کی جانب سے بھارت کے مجموعی طور پر 85ڈرون تباہ کئے گئے۔گرائے گئے ڈورنز میں بھارت کا 1ہیرون یواے وی اور 84کلرز ڈورن شامل ہیں۔
