کراچی(این این آئی)اداکار، میزبان اور پروڈیوسرفہد مصطفی نے کہا ہے کہ مشہور ڈرامے کبھی میں کبھی تم کا سیکوئل کبھی نہیں بننے دوں گا۔ فہد مصطفی نے حالیہ انٹرویو میں اپنے شہرہ آفاق ڈرامہ سیریل ”کبھی میں کبھی تم”کے سیکوئل سے متعلق تمام افواہوں کو دوٹوک انداز میں ختم کر دیا۔انہوں نے کہا کہ میں کبھی بھی اس ڈرامے کا سیکوئل بننے نہیں دوں گا، یہ ایک مکمل کہانی ہے جو اپنے انجام کو پہنچ چکی ہے، اسے چھیڑنا زیادتی ہوگی،بعض کہانیاں وہیں رہنے دی جائیں تو بہتر ہوتا ہے اور یہی اصل کامیابی کی علامت ہے۔فہد مصطفی کے اس بیان کے بعد سوشل میڈیا پر مداحوں کی مختلف آرا سامنے آ رہی ہیں، کچھ لوگ ان کے فیصلے کو سراہا رہے ہیں کہ انہوں نے فن کو تجارتی فائدے پر ترجیح دی، جبکہ کچھ شائقین افسردہ ہیں کیونکہ وہ اس محبت بھری کہانی کو دوبارہ دیکھنے کے خواہاں تھے۔
