اسلام آباد(این این آئی)وزیردفاع خواجہ آصف نے کہاہے کہ مودی سرکار کی نفرت کی سیاست بھارت کے درجنوں ٹکرے کرے گی،پاکستان پہ الزام لگانے سے پہلے اپنی منجھی تھلے ڈانگ پھیرو۔جمعہ کووزیر دفاع خواجہ آصف نے سماجی رابطے کے پلیٹ فارم ایکس پر بیان میں کہا کہ مودی سرکار جان لے جب آپ کشمیر میں لاکھوں کی آبادی کو سالوں محصور رکھیں، مستقل کرفیو نافذ ر کھیں، ان پہ زندگی تنگ کر دیں، 10لاکھ فوج مسلط کرکے پوری نسل کو یرغمال بنالیں اور ظلم کی انتہا کر دیں تو مودی پھر اس طرح تو ہوتا ہے اس طرح کے کاموں میں، پاکستان پہ الزام لگانے سے پہلے اپنی منجھی تھلے ڈانگ پھیرو، یہ واردات آپ کی دہشت گردانہ ذہنیت کا کارنامہ ہے یا پھر”ظلم پھر ظلم بڑھتا ھے تو مٹ جاتا ہے …خون پھر خون ہے ٹپکے گا تو جم جائے گا”۔خواجہ آصف نے کہا کہ مودی سرکار کی نفرت کی سیاست منی پور، ناگا لینڈ، تری پورہ، چھتیس گڑھ، پنجاب، کشمیر اور بہت سے علاقے بھارت کے درجنوں ٹکرے کرے گی۔انہوںنے کہاکہ محبت اور رواداری بانٹیں آپ گجرات کے نہیں، ہندوستان کے وزیراعظم ہیں جو قومیتوں اور مذاہب کا مجموعہ ہے، ہندو توا کا پرچار بھارت کے اتنے ٹکرے کرے گا، آپ سے گنتی بھی نہیں ہوگی۔وزیر دفاع نے کہا کہ بھارت کے اندر بھی شانتی رکھیں اور ہمسایوں سے بھی شانتی سے رہیں،دہشت گردی کینیڈا امریکہ اور ہمسایوں کو ایکسپورٹ نہ کریں، اپنی اوقات میں رہیں۔
