اسلام آباد(این این آئی)نائب وزیراعظم اسحق ڈار سے برطانیہ کی وزارت ہائوسنگ، کمیونٹیز اور لوکل گورنمنٹ میں پارلیمانی انڈر سیکرٹری لارڈ واجد خان نے بدھ کو یہاں ملاقات کی۔ دفتر خاجہ کی جانب سے جاری بیان کے مطابق انہوں نے باہمی دلچسپی کے امور پر تبادلہ خیال کیا۔ نائب وزیراعظم نے ایک مضبوط، وسیع البنیاد، کثیر جہتی پاکستان-برطانیہ شراکت داری کیلئے پاکستان کے عزم کا اعادہ کیا اور خیر سگالی تعلقات کو فروغ دینے میں برطانوی پاکستانی کمیونٹی کے کردار کو سراہا۔ لارڈ واجد خان نے معاشی اصلاحات کیلئے حکومت کے عزم کو تسلیم کرتے ہوئے کہاکہ اس کے پاکستان کے معاشی استحکام پر حوصلہ افزا اثرات مرتب ہورہے ہیں۔
