لندن (این این آئی)وزیراعظم شہباز شریف نے کہا ہے کہ دہشت گرد افغانستان سے آپریٹ کر رہے ہیں، افغانستان دہشت گردوں کو لگام ڈالے،پاکستانی عوام اور قانون نافذ کرنے والے اداروں کی قربانیاں رائیگاں نہیں جائیں گی۔میڈیا سے گفتگو میں شہباز شریف نے کہاکہ دورہ بیلا روس میں زراعت سمیت دیگرشعبوں میں تعاون پر بات ہوئی۔انہوں نے کہا کہ پاکستان میں معدنیات کے بے پناہ ذخائر ہیں، معدنیات کے حوالے سے مشینری بیلاروس میں بنتی ہے، زرعی مشینری کیلئے بیلاروس کی کمپنیوں سے جوائنٹ وینچرکریں گے، بیلا روس کی ذراعت کے شعبے میں مہارت سے فائدہ اٹھائیں گے اور بیلاروس میں بننے والی زرعی مشینری بھی پاکستان میں بنے گی۔انہوںنے کہاکہ ڈیڑھ لاکھ پاکستانیوں کو بیلارس میں روزگاردینے پرمفاہمت ہوئی۔وزیراعظم نے کہا کہ دہشت گرد افغانستان سے آپریٹ کر رہے ہیں، افغانستان دہشت گردوں کو لگام ڈالے، افغان عبوری حکومت کو کئی بار کہا ہے دوحا معاہدے پرعمل کریں اور دہشت گردوں کو افغان سر زمین استعمال نہ کرنے دیں لیکن کالعدم دہشت گرد تنظیمیں افغانستان سے آپریٹ کرتی ہیں اور کئی پاکستانیوں کو شہید کرچکی ہیں۔انہوں نے کہا کہ پاکستان کے عوام، افواج، پولیس اور قانون نافذ کرنے والے اداروں کی قربانیاں رائیگاں نہیں جائیں گی، ہم ہمسائے نہیں بدل سکتے، یہ ہم پر منحصر ہے کہ اچھے ہمسائے کی طرح رہنا ہے یا تنازعات کے ساتھ۔انہوںنے کہاکہ نوازشریف کی لیڈر شپ میں پاکستان کو ترقی کی راہ پر لے کر چل رہے ہیں، پنجاب اسپیڈ بھی پاکستان اسپیڈ تھی اور اب سپر پاکستان اسپیڈ ہے، ترقی کرتا اورخوشحال پاکستان ہماری منزل ہے۔انہوں نے کہا کہ اوورسیزکنونشن میں بیرون ملک مقیم پاکستانیوں سے ملاقات کا موقع ملے گا، کنونشن اوورسیز پاکستانیوں سے بات چیت کرنے کا بہت شاندار موقع ہے، کنونشن میں اووسیزپاکستانیوں کے جائزمطالبات کوسنیں گے اورجس قدرہوسکا عمل کریں گے۔شہباز شریف نے کہاکہ پاکستانی عوام اور قانون نافذ کرنے والے اداروں کی قربانیاں رائیگاں نہیں جائیں گی، اس سال ترسیلات زرمیں کافی اضافہ ہوا۔خیال رہے کہ گزشتہ دنوں وزیراعظم شہباز شریف نے بیلاروس کا دورہ کیا تھا، اس دورے میں نواز شریف بھی ان کے ہمراہ تھے۔
