لاہور( این این آئی)راولپنڈی کرکٹ اسٹیڈیم ایچ بی ایل پی ایس ایل کی پہلی افتتاحی تقریب کی میزبانی کرے گا۔ تقریب 11 اپریل بروز جمعہ شام 7 بجے شروع ہوگی۔ چھ ٹیموں پر مشتمل ٹورنامنٹ کا افتتاحی میچ دفاعی چمپئن اسلام آباد یونائیٹڈ اور دو مرتبہ کی فاتح لاہور قلندرز کے درمیان کھیلا جائے گا جس کی پہلی گیند رات 8.30 بجے کی جائے گی۔یہ ایونٹ چار مقامات پر کھیلا جائے گا جن میں کراچی کا نیشنل بینک اسٹیڈیم، لاہور کا قذافی اسٹیڈیم، ملتان کرکٹ اسٹیڈیم اور راولپنڈی کرکٹ اسٹیڈیم شامل ہے۔ ایونٹ کا فائنل 18 مئی کو قذافی اسٹیڈیم میں ہونا ہے۔راولپنڈی کرکٹ اسٹیڈیم میں ہونے والی افتتاحی تقریب میں معروف صوفی میوزک آرٹسٹ عابدہ پروین کی پرفارمنس کے ساتھ ینگ اسٹنرز کی پرفارمنس پیش کی جائے گی۔ اس کے علاوہ ابرار الحق، علی ظفر، نتاشا بیگ اور طلحہ انجم بھی افتتاحی تقریب میں پرفارم کریں گے۔ تقریب کے دوران آتش بازی کا مظاہرہ بھی کیا جائے گا۔
