اسلام آباد(این این آئی)صدر مملکت آصف علی زرداری نے پاکستان کے عظیم رہنما شہید ذوالفقار علی بھٹو کی خدمات، جدوجہد اور قربانیوں کو خراج عقیدت پیش کرتے ہوئے کہا ہے کہ ملک کی خودمختاری، جمہوریت اور عوامی حقوق کے تحفظ کے لیے ہر ممکن اقدام کریں گے۔ ایوان صدر کے پریس ونگ کے مطابق صدر مملکت نے شہید ذوالفقار علی بھٹو کی برسی کے موقع پرجو (کل) جمعہ کو منائی جارہی ہے، اپنے پیغام میں کہا کہ پاکستان کو شہید بھٹو کے وڑن کے مطابق ایک ترقی یافتہ، خودمختار اور عوام دوست ملک بنائیں گے۔ انہوں نے کہا کہ شہید بھٹو ایک عظیم مدبر، جرات مند رہنما اور عوام کے حقیقی نمائندہ تھے، شہید ذوالفقار علی بھٹو نے پاکستان کو ترقی، خودمختاری اور عوامی فلاح کے راستے پر گامزن کیا۔ صدر مملکت نے کہا کہ شہید ذوالفقار علی بھٹو نے قوم کو پہلا متفقہ آئین دیا، انہوں نے پاکستان کے ایٹمی پروگرام کی بنیاد رکھی اور ملک کی خارجہ پالیسی کو ایک آزاد اور خودمختار تشخص دیا۔صدر آصف علی زرداری نے کہا کہ شہید ذوالفقار علی بھٹو کی قیادت میں پاکستان نے اسلامی سربراہی کانفرنس کی میزبانی کی اور مسلم امہ کے اتحاد کی راہ ہموار کی۔ صدر مملکت نے کہا کہ شہید بھٹو نے مزدوروں، کسانوں اور پسے ہوئے طبقے کو حقوق دیئے اور انہیں بااختیار بنایا، شہید ذوالفقار علی بھٹو کے اقدامات کی بدولت تعلیم، صنعت اور دفاعی شعبے میں نمایاں پیش رفت ہوئی۔ انہوں نے کہا کہ ہم شہید ذوالفقار علی بھٹو کے مشن کو جاری رکھیں گے اور پاکستان کی خودمختاری، جمہوریت اور عوامی حقوق کے تحفظ کے لیے ہر ممکن اقدام کریں گے۔ صدر مملکت نے کہا کہ آج کے دن عہد کرتے ہیں کہ پاکستان کو شہید بھٹو کے وڑن کے مطابق ایک ترقی یافتہ، خودمختار اور عوام دوست ملک بنائیں گے۔
