اسلام آباد (این این آئی)وزیراعظم شہباز شریف نے ارتھ آور پر روشن ، زیادہ پائیدار کل کی تعمیر کیلئے مل کر کام کرنے کی ضرورت پر زور دیتے ہوئے کہاہے کہ ارتھ آور کا مقصد زمین کی حفاظت بارے اقدامات اٹھانے کی ترغیب دینے، آگہی پیدا کرنے، افراد،کاروباروں اور کمیونٹیز کو پائیدار طریقوں کو اپنانے کیلئے بااختیار بنانا ہے،حکومت فعال طور پر ایسی پالیسیوں پر عمل پیرا ہے جو تمام شعبوں میں موسمیاتی عمل کو مربوط کرتی ہیں۔ارتھ آور 2025ء کے موقع پر جاری پیغام میں وزیراعظم شہبازشریف نے کہا کہ ہر سال ارتھ آور کے دوران دنیا بھر میں لاکھوں لوگ علامتی طور پر اپنے استعمال میں آنیوالے روشنیوں کے آلات کو بند کرتے ہیں ،ارتھ آور کا مقصد زمین کی حفاظت کے حوالے سے اقدامات اٹھانی کی ترغیب دینے، آگہی پیدا کرنے، اور اس حوالے سے افراد،کاروباروں اور کمیونٹیز کو پائیدار طریقوں کو اپنانے کے لیے بااختیار بنانا ہے۔ انہوں نے کہا کہ عالمی سطح پر گرین ہائوس گیسوں کے اخراج میں 1فیصد سے بھی کم حصہ ڈالنے کے باوجود پاکستان کا شمار موسمیاتی تبدیلی سے سب سے زیادہ متاثر ممالک میں ہوتا ہے، ہم نے تباہ کن سیلابوں، شدید گرمی کی لہروں، اور طویل خشک سالی کا سامنا کیا ہے ایسے واقعات جو لاکھوں زندگیوں، غذائی تحفظ، آبی وسائل اوربنیادی ڈھانچے کے لئے خطرے کا باعث بنتے ہیں۔ انہوں نے کہا کہ ہماری حکومت فعال طور پر ایسی پالیسیوں پر عمل پیرا ہے جو تمام شعبوں میں موسمیاتی عمل کو مربوط کرتی ہیں، ریچارج پاکستان جیسے پروگرام ماحولیاتی نظام کو بحال کر رہے ہیں، جبکہ نیشنل اڈاپٹیشن پلان 2023ء اور نیشنل کلین ایئر پالیسی 2023ء جیسے اقدامات ایک صاف ستھرا، زیادہ پائیدار مستقبل کیلئے اسٹریٹجک روڈ میپ فراہم کرتی ہیں۔ انہوں نے کہا کہ قابل تجدید توانائی کی توسیع، پلاسٹک کے فضلے میں کمی، اور اس حوالے سے گرین ملازمتوں کی فراہمی طویل مدتی ماحولیاتی ذمہ داری کی بنیاد رکھ رہی ہے۔ تاہم صرف پالیسیاں ہی کافی نہیں ہیں حقیقی تبدیلی گھر سے شروع ہوتی ہے، ہر عمل، خواہ کتنا ہی چھوٹا ہو، ایک پائیدار کل کی جانب اجتماعی رفتار کو مضبوط کرتا ہے۔ انہوں نے کہاکہ آئیے ایک روشن اور زیادہ پائیدار کل کیلئے مل کر کام کریں۔
