اسلام آباد(این این آئی)وزیر دفاع خواجہ آصف نے کہا ہے کہ بلوچستان میں دہشت گردی کے تانے بانے ایران اور افغانستان سے ملتے ہیں ، دہشتگردوں کے خلاف کثیرالجہتی اور ٹارگٹڈ آپریشن ہوگا،پی ٹی آئی نے کہہ دیا ہے وہ آپریشن کے حق میں نہیں ہیں۔ایک انٹرویو میں وزیردفاع خواجہ آصف نے کہاکہ اس وقت کے ایک اجلاس میں شہباز شریف جنرل (ر)قمر جاوید باجوہ سے یہ سوال نہ پوچھ سکے کہ دہشت گردوں کو واپس کیوں لایا جا رہا ہے۔خواجہ آصف کے مطابق اجلاس میں محسن داوڑ نے اس پالیسی کی مخالفت کی اور اپنے تحفظات کا اظہار کیا لیکن انہیں دوبارہ بولنے سے روک کر چپ کرا دیا گیا۔انہوں نے کہا کہ بہت سے لوگوں نے اس فیصلے پر اعتراضات اٹھائے مگر مخالفت اس شدت سے نہ ہو سکی جس کے اثرات کو موثر طریقے سے سنبھالا جا سکتا اور اس پالیسی کے نتیجے میں تقریباً 4ہزار دہشت گردوں کو واپس لا کر بسایا گیا جس کے خلاف سوات میں عوامی جلوس بھی نکلے۔انہوں نے بتایا کہ بلوچستان میں دہشت گردی کے تانے بانے ایران اور افغانستان سے ملتے ہیں، پاکستان نے خفیہ ٹھکانوں اور بارڈر پار ہائیڈ آوٹس پر حملے کیے لیکن تعداد کو ٹی وی پر ظاہر نہیں کیا جا سکتا۔انہوںنے کہاکہ اگر انہیں مکمل طور پر ختم نہ کیا گیا تو یہ ریاست کیلئے سنگین خطرہ بن جائیں گے۔خواجہ آصف نے دہشت گردی کے خاتمے کیلئے دو حکمت عملیوں کا ذکر کیا، ایک ”کائنیٹک اسٹریٹجی”جو متاثرہ علاقوں میں فورس کے استعمال پر مبنی ہوگی اور دوسری ”سوفٹ اینڈ ہارڈ اسٹیٹ” پالیسی۔انہوں نے کہا کہ ریاست کو مضبوط ہونا چاہیے اور ڈیلیورنس اس سطح تک لے جانی چاہیے جہاں شدت پسندی کے رجحانات بڑھ رہے ہیں۔بلوچستان کے حالات پر بات کرتے ہوئے انہوں نے کہا کہ روایتی لیڈرشپ اور قبائلی زعما اب یہ مان رہے ہیں کہ دہشت گرد ان کے قابو میں نہیں اور یہ مسئلہ نوجوان نسل کے ہاتھ میں چلا گیا ہے۔انہوں نے جنرل ضیا کے دور میں افغانستان میں مداخلت کو بھی تنقید کا نشانہ بنایا اور کہا کہ یہ جہاد نہیں، بڑی طاقتوں کی جنگ تھی جس میں پاکستان چمچہ بنا۔انہوںنے کہاکہ دہشت گردی کے خلاف قوم متحد تھی لیکن اب وقت ہے کہ اسے جڑ سے ختم کرنے کے لیے اقدامات کیے جائیں ورنہ اس کے اثرات جلد نظر آنا شروع ہو جائیں گے۔انہوں نے کہا کہ پی ٹی آئی نے کہہ دیا ہے وہ آپریشن کے حق میں نہیں ہیں ، وزیر اعلیٰ خیبر پختونخوا علی امین گنڈا پور نے آپریشن کی مخالفت کی نہ حق میں بات کی ، انہوں نے رسمی طور پر ایک تنقید بھی کی ہے اور کہا کہ ہمارے لیڈر کے ساتھ ناانصافی ہورہی ہے، دہشتگردی کے پرچے میرے پر بھی بنے ہوئے ہیں ، یہ اچھا کام نہیں ہے۔انہوںنے کہاکہ دہشتگردی کے ناسور کو ختم کرنے پر فوکس ہے، پی ٹی آئی صرف بانی پی ٹی آئی میں دلچسپی رکھتی ہے، ان کا اول اور آخر بانی پی ٹی آئی ہے، ان کی نظر میں بھاڑ میں جائے پاکستان ، کہتے ہیں بانی نہیں تو پاکستان نہیں، بانی جہاں بھی ہوتے آپ کو حصہ لینا چاہیے تھا، وہ رات کے 11بجے اجلاس میں شرکت سے مکرے ہیں، مطالبات کریں تو ایسا تو نہیں چل سکتا۔خواجہ آصف نے ملٹری کورٹس کی حمایت کا اعلان کیا اور کہا کہ ان کی جماعت اسے سپورٹ کرے گی۔انہوںنے کہاکہ صحت کی وجہ سے نواز شریف ملاقاتوں سے گریز کرتے ہیں، ڈاکٹرز نے سفر سے پرہیز اور سرگرمیاں محدود کرنے کا کہا ہے، انہوں نے خود کہا ہے میری طبیعت خراب ہے۔
