اسلام آباد (این این آئی)محکمہ موسمیات نے (آج) اتوار سے ملک کے مختلف شہروں میں بارش کی پیش گوئی کی ہے جس کے باعث اسلام آباد، لاہور، پشاور میں اربن فلڈنگ کا خدشہ ہے ۔محکمہ موسمیات کے مطابق مغربی ہوائوں کا سلسلہ 9مارچ سے ملک کے شمالی علاقوں میں داخل ہوگا اور مغربی ہوائوں کا یہ سلسلہ ملک میں 16مارچ تک برقرار رہے گا۔محکمہ موسمیات کے مطابق 10مارچ کو اسلام آباد، راولپنڈی، اٹک، جہلم، چکوال، پشاور، چارسدہ اور مردان میں بارش متوقع ہے جبکہ 12سے 16مارچ کے دوران پنجاب کے بیشتر شہروں میں بارشوں کی توقع ہے۔محکمہ موسمیات کے مطابق 14اور 15مارچ کو بلوچستان کے علاقوں میں گرج چمک کے ساتھ بارشوں کا امکان ہے اور بارشوں کے باعث اسلام آباد، لاہور، پشاور، کوئٹہ اور دیگر شہروں میں اربن فلڈنگ کا خدشہ ہے۔محکمہ موسمیات کے مطابق ملک کے بالائی علاقوں میں شدید برفباری سے سڑکیں بند ہونے کا امکان ہے۔محکمہ موسمیات کے مطابق خیبر پختونخوا، کشمیر اور گلگت بلتستان میں شدید بارشوں کے باعث لینڈ سلائیڈنگ کا خدشہ ہے لہذا ماہی گیر، سیاح اور مسافر محتاط رہیں اور کسان فصلوں کو نقصان سے بچانے کیلئے پیشگی اقدامات کریں۔
