لاہور( این این آئی) انسٹی ٹیوٹ آف پبلک اوپینین ریسرچ کی جانب سے صوبے کے 36 اضلاع میں وزیراعلی مریم نواز کی حکومت کی کارکردگی سے متعلق سروے کے نتائج جاری کردئیے گئے، جس میں پنجاب کے 62 فیصد عوام نے عوامی خدمت اور مسائل کے حل کے لیے وزیراعلی مریم نواز کی ایک سالہ کارکردگی کو غیر معمول قرار دے دیا ۔ سروے میں تعلیم اور صحت کے شعبے میں 73 اور 68 فیصد عوام نے وزیر اعلی کے اقدامات کو اچھا اور بہت اچھا قرار دیا ۔ اسی طرح روزگار کی فراہمی کے حوالے سے پنجاب کے 63 فیصد عوام نے پنجاب حکومت کی کارکردگی کو خراب یا بہت خراب کہا ۔ پنجاب کے 57 فیصد شہریوں کی رائے میں گزشتہ ایک سال کے دوران حکومتی کارکردگی (گورننس )کا معیار بہتر ہوا ہے، 17 فیصد کے مطابق کاکردگی خراب ہوئی ، 57 فیصد عوام سمجھتے ہیں کہ عوام اور حکمرانی کے بنیادی مسائل کو موثر انداز میں حل کیا گیا ہے۔ سروے نتائج کے مطابق پنجاب کے 60 فیصد عوام کو یقین ہے کہ مریم نواز شریف نے کارکردگی میں دیگر 3 صوبوں کے وزرائے اعلی کو پیچھے چھوڑ دیا ہے۔ اسی طرح عوام نے تعلیم، صحت، انفرا اسٹرکچر اور ستھرا پنجاب وزیر اعلی مریم نواز کے سب سے بہترین کام قرار دیئے۔ رپورٹ کے مطابق تعلیم کے شعبے میں 15 فیصد، صحت میں 14، سٹرکوں اور عمارتوں کی تعمیر میں 11 اور ستھرا پنجاب میں 11 فیصد بہتری آئی ۔ جن شعبوں کو فوری توجہ دینے کا مطالبہ کیا گیا،ان میں روزگار 13 فیصد، صحت کی سہولیات13فیصد اور مہنگائی پر قابو پانا 12فیصد سرفہرست ہے ۔ صوبے کے 53 فیصد عوام نے رائے دی کہ پی ٹی آئی کے مقابلے میں مریم نواز شریف کے وزیر اعلی بننے کے بعد پنجاب حکومت کی کارکردگی اور عوامی خدمت کا معیار بہتر ہوا۔ یہ سروے پنجاب کے 36 اضلاع کے 66 شہریوں کی رائے سے مرتب کیا گیا ۔ دیہی اور شہری علاقوں میں یہ سروے 3 سے 18 فروری کے دوران کیا گیا۔
