نارووال (این این آئی) وفاقی وزیر منصوبہ بندی احسن اقبال نے کہا ہے کہ امن و استحکام برقرار رہا تو چند سال میں پاکستان ترقی کی مثال بن کر ابھرے گا۔نارووال میں میڈیا سے گفتگو کرتے ہوئے احسن اقبال نے کہاکہ نوجوانوں کو گالم گلوچ اور نفرت کے ہتھیار نہیں دینا چاہتے،مجھے کھیلوں کے منصوبے کے جرم میں جیل میں ڈالا گیا، انتقامی سیاست نے ملک میں تباہی کی۔ انہوں نے کہا کہ ملک کو دیوالیہ کرنیوالے آج دنیا میں پاکستان، فوج مخالف مہم چلارہے ہیں۔ انہوں نے کہا کہ نواز شریف نے امریکہ کے دبائو کے باوجود پاکستان کو ایٹمی قوت بنایا، کسی دشمن کو جرات نہیں کہ کوئی ہماری طرف میلی نگاہ اٹھا سکے۔
