ابوظہبی(این این آئی)متحدہ عرب امارات میں پاکستان کے سفیر فیصل نیاز ترمذی نے پاکستان اسلامی سکول العین کے طلباکو اے ڈی ای کے سپورٹس مقابلہ (ابوظہبی سپورٹس چیمپئن شپ 25۔2024) میں شاندار کامیابیوں پر مبارکباد پیش کی۔ یو اے ای میں پاکستان کے سفارتخانہ کے بیان کے مطابق طلبا نے غیر معمولی صلاحیتوں کا مظاہرہ کرتے ہوئے کانسی کے تمغے حاصل کئے اور العین ریجن کے چیمپئن کا اعزاز حاصل کیا۔ ابراہیم سعید نے 100 میٹر ریس میں کانسی کا تمغہ جیتا جبکہ بدر حمید نے ہائی جمپ مقابلہ میں کانسی کا تمغہ حاصل کیا۔ دونوں طلباکو العین ریجن کے چیمپئن کا اعزاز دیا گیا اور 23 فروری کو ابوظہبی کے شیخ زید سپورٹس ہب میں مہمان خصوصی کی جانب سے تمغوں سے نوازا گیا۔ پاکستانی سفیر نے طلبا کی شاندار کارکردگی کو سراہا اور شخصیت کی تشکیل میں کھیلوں اور غیر نصابی سرگرمیوں کی اہمیت پر روشنی ڈالی۔ انہوں نے زور دیا کہ ایسی سرگرمیاں طلبامیں نظم و ضبط، ٹیم ورک اور قیادت کی صلاحیتیں پروان چڑھانے میں اہم کردار ادا کرتی ہیں۔ انہوں نے پاکستان اسلامی سکول العین کی انتظامیہ، اساتذہ اور عملے کی ان کی کوششوں کی بھی تعریف کی جنہوں نے طلبا کو بہترین ماحول فراہم کیا تاکہ وہ اپنی صلاحیتوں کو اجاگر کر سکیں۔ انہوں نے سفارتخانہ کے اس عزم کی تصدیق کی کہ وہ متحدہ عرب امارات میں پاکستانی طلبا کی ہمہ جہت ترقی کو فروغ دینے والے اقدامات کی حمایت کرتے رہیں گے۔
