اسلام آباد (این این آئی)رمضان المبارک 1446ہجری کا چاند دیکھنے کیلئے مرکزی رویت ہلال کمیٹی کا اجلاس 28فروری کو طلب کرلیا گیا۔چیئرمین رویت ہلال کمیٹی مولانا عبدالخبیر آزاد کی زیر صدارت اجلاس پشاور میں طلب کیا گیا ہے۔اجلاس 29شعبان المعظم 1446 ہجری بروز جمعہ محکمہ اوقاف پشاور کی بلڈنگ میں ہوگا۔چند روز قبل رمضان المبارک کے چاند سے متعلق پاکستان اسپیس اینڈ اپر ایٹموسفیئر ریسرچ کمیشن(اسپارکو)نے امکان ظاہر کیا تھا کہ پاکستان میں رمضان المبارک 2مارچ 2025ء سے شروع ہوگا۔سپارکو اعلامئے میں کہا گیا تھا کہ نیا چاند 28فروری 2025ء کو پاکستانی وقت کے مطابق صبح 5بجکر 45منٹ پر پیدا ہوگا اور غروب آفتاب کے وقت چاند کی عمر 12گھنٹے ہوگی، پاکستان کی بجائے سعودی عرب میں 28فروری کو چاند نظر آسکتا ہے۔سپارکو کے مطابق شوال کا چاند ملک بھر میں 30مارچ کو متوقع ہے جس کے باعث عیدالفطر 31مارچ کو ہوسکتی ہے۔ریسرچ کمیشن نے کہا ہے کہ رمضان کے چاند کی رویت کا حتمی فیصلہ رویت ہلال کمیٹی کے پاس ہے۔
