بیجنگ(این این آئی)چین نے کہا ہے کہ عالمی برادری کو یوکرین بحران کو حل کرنے کی کوششوں کے درمیان غزہ کی پٹی کو نہیں بھولنا چاہیے۔میڈیارپورٹس کے مطابق یہ بات چینی وزیر خارجہ وانگ یی نے کثیرالجہتی پر عمل کرنے اور عالمی طرز حکمرانی میں اصلاحات بارے اقوام متحدہ کی سلامتی کونسل کے اجلاس کے بعد پریس کانفرنس میں کہی۔ انہوں نے نشاندہی کی کہ تمام فریق اس وقت یوکرین بحران کے بارے میں فکر مند ہیں لیکن صرف ایک یوکرین کا مسئلہ نہیں ہے بلکہ دنیا میں اور بھی بہت سے مقامات ہیں جو تنازعات کا شکار ہیں جیسے غزہ تنازعہ، جس پر بین الاقوامی برادری کی توجہ بھی درکار ہے اور اسے پس منظر میں نہیں دھکیلا جانا چاہیے۔انہوں نے اس بات پر زور دیتے ہوئے کہا کہ اقوام متحدہ کی جانب سے دو ریاستوں، فلسطین اور اسرائیل کے قیام کی قرارداد کو منظور کئے ہوئے 70 سال سے زائد کا عرصہ گزر چکا ہے لیکن اس فیصلے میں سے صرف نصف پر عمل ہو سکا ہے۔ چینی وزیر خارجہ نے مزید کہا کہ ریاست اسرائیل کو قائم ہوئے کافی عرصہ ہو چکا ہے لیکن فلسطینیوں کے پاس اب بھی اپنا ملک نہیں ہے۔
