ٹیکسلا (این این آئی)وفاقی مشیرِ قانون و انصاف بیرسٹر عقیل ملک نے کہا ہے کہ بانی پی ٹی آئی بار بار خط لکھ کر مدد مانگتے ہیں اور کہتے ہیں کہ ہمارے معاملات حل کریں۔میڈیا سے گفتگو کرتے ہوئے انہوں نے کہا کہ اگلا خط بانی پی ٹی آئی امریکی صدر ڈونلڈ ٹرمپ کو لکھیں گے اور اس کا جواب بھی نہیں آئے گا۔بیرسٹر عقیل ملک نے کہا کہ آرمی چیف دو ٹوک موقف اختیار کر چکے ہیں کہ سیاست میں ان کا کوئی کردار نہیں، یہ خط کہیں موصول نہیں ہونا، اگر موصول ہو بھی گیا تو وزیرِ اعظم کو بھیجا جائے گا۔مسلم لیگ ن کے رہنما نے کہا کہ لگتا ہے بانی پی ٹی آئی کے قلم کی سیاہی ختم ہو جائے گی مگر خط لکھنے کی عادت ختم نہیں ہو گی۔انہوںنے کہاکہ ہمیں خط و کتابت سے نکل کر اس قوم کا سوچنا چاہیے۔
