دبئی / اسلام آباد (این این آئی) پاکستان اور سری لنکا نے اعلی سطحی تبادلوں کو بڑھانے ،بہتر تعاون کے نئے مواقع تلاش کرنے پر اتفاق کیا ہے۔منگل کو وزیراعظم شہبازشریف اور سری لنکا کے صدر انورا کمارا ڈسانائیکے نے دبئی میں ورلڈ گورنمنٹس سمٹ کے موقع پر پہلی ملاقات کی اور دونوں ممالک کے درمیان موجودہ خیر سگالی کو فروغ دینے پر اتفاق کیا۔ دونوں رہنماوں نے دو طرفہ تعلقات کے اہم پہلوئوں بالخصوص تجارت، دفاع و سلامتی، تعلیم، مذہبی سیاحت اور کھیلوں کے شعبوں میں تعاون پر تبادلہ خیال کیااور اعلی سطح کے تبادلوں کو بڑھانے اور بہتر تعاون کے نئے مواقع تلاش کرنے پر اتفاق کیا۔سری لنکا کے صدر نے دونوں برادر ممالک کے درمیان خوشگوار اور مضبوط تعلقات کو سراہتے ہوئے 1996ء کے لاہور میں منعقدہ کرکٹ ورلڈ کپ کے فائنل کے حوالے سے اپنی خوشگوار یادوں کا بھی ذکر کیا۔ ملاقات میں سارک کو مزید متحرک کرنے سمیت علاقائی اور کثیرجہتی امور پر بھی تبادلہ خیال کیا گیا۔
