اسلام آباد(این این آئی)پاکستان تحریک انصاف خیبرپختونخوا میں اختلافات مزید بڑھ گئے،پی ٹی آئی مرکزی رہنما اعظم سواتی نے عوامی نمائندوں پر الزامات لگادئیے، جس پرسپیکر خیبرپختونخوا اسمبلی نے وزیراعلیٰ کو خط لکھ کر مانسہرہ کے عوامی نمائندوں پر کرپشن الزامات کی شفاف تحقیقات کا مطالبہ کردیا۔تفصیلات کے مطابق پی ٹی آئی خیبر پختونخوا میں اختلافات مزید بڑھ گئے ہیں، سابق وفاقی وزیر اعظم سواتی کے عوامی نمائندوں پر الزامات کے بعد سپیکر خیبرپختونخوا اسمبلی بابر سلیم سواتی نے وزیراعلیٰ خیبرپختونخوا علی امین گنڈا پور کو خط لکھ دیا۔خط میں بابر سلیم سواتی نے کرپشن الزامات پر ٹربیونل یا انکوائری کمیٹی کے قیام کا مطالبہ کردیاہے۔خط کے متن میں کہا گیاہے کہ منتخب عوامی نمائندوں کی ساکھ اور شفافیت کے تحفظ کیلئے فوری تحقیقات ضروری ہیں۔ خط میں سابق سینیٹراعظم سواتی کے الزامات پر کارروائی کا مطالبہ کیا گیا ہے۔خط کے متن میں بابر سلیم سواتی نے کہاہے کہ عوام کے سامنے جوابدہ ہوں، جمہوری اقدار کا تحفظ میری اولین ترجیح ہے، کرپشن الزامات کی غیر جانبدار تحقیقات کے لیے ٹریبونل یا کمیشن تشکیل دیا جائے۔خط چیئرمین پی ٹی آئی عمران خان، صوبائی صدر اور داخلی احتسابی کمیٹی کو بھی ارسال کیا گیا ہے۔
