ریاض / اسلام آباد (این این آئی)سعودی عرب جانیوالے پاکستانی عمرہ زائرین کیلئے پولیو ویکسین لازمی قرار دے دی گئی ہے، اس حوالے سے سعودی ادارے جنرل اتھارٹی آف سول ایوی ایشن کی جانب سے باضابطہ مراسلہ جاری کیا گیا ہے۔وزارت مذہبی امور نے عمرہ زائرین، عمرہ آپریٹرز اور ایئرلائن دفاتر کو ہدایات جاری کرتے ہوئے کہا ہے کہ تمام عمرہ زائرین سعودی عرب روانگی سے کم از کم 4ہفتے قبل پولیو ویکسین حاصل کریں اور اس کا سرٹیفکیٹ اپنے ہمراہ رکھیں۔وزارت مذہبی امور کے مطابق روانگی کے وقت ویکسی نیشن کا عمل 6ماہ سے زیادہ پرانا نہیں ہونا چاہیے، بصورت دیگر زائرین کو مشکلات کا سامنا کرنا پڑ سکتا ہے۔سعودی حکومت نے خبردار کیا ہے کہ ان ہدایات کی خلاف ورزی کرنیوالے افراد یا اداروں کے خلاف قانونی کارروائی کی جا سکتی ہے۔ اس فیصلے کا مقصد عوامی صحت کے تحفظ کو یقینی بنانا اور عمرہ زائرین کو کسی بھی ممکنہ وبائی خطرے سے محفوظ رکھنا ہے۔
