لاہور( این این آئی)آئی سی سی چیمپئنز ٹرافی کے لیے پاکستان کرکٹ ٹیم کی نئی کٹ کی رونمائی کردی گئی۔وزیر اعظم شہباز شریف نے لاہور میں نو تعمیر شدہ قذافی اسٹیڈیم کا افتتاح کیا جس کے بعد جاری تقریب میں کھلاڑیوں نے کٹ کی رونمائی کر دی۔پی سی بی کے مطابق shop.pcb.com.pk پر جا کر شائقین کرکٹ اس کٹ کو خرید سکتے ہیں۔اس موقع پر بات کرتے ہوئے قومی ٹیم کے کپتان محمد رضوان نے کہا کہ ہمارے احساسات بہت اچھے ہیں، جب ہم اپنے کرائوڈ میں کھیلتے ہیں تو جذبہ ہی کچھ اور ہوتا ہے۔انہوں نے کہا کہ ہمیں لاہور میں جذبہ ملتا ہے، ہمیں امید ہے کہ اسی طرح سپورٹ ملے گی۔کٹ کی رونمائی کے موقع پر بابر اعظم نے بات کرتے ہوئے کہا کہ آپ سب کو مبارکب ہو کہ نیا اسٹیڈیم بنا، لاہور میں ہم جب بھی کھیلتے ہیں، ہمیں بہت زیادہ سپورٹ ملتی ہے۔شاہین شاہ آفریدی نے کہا کہ لاہوریوں نے ہمیشہ ہی سپورٹ کیا ہے، ہمیں اس سیریز اور پوری چیمپئنز ٹرافی میں یہی سپورٹ چاہیے ہو گی، ہمارے لیے دعا کریں، یہ چیمپئنز ٹرافی پاکستان کی ہے،نئے اسٹیڈیم کے ساتھ نئی یادیں بنائیں گے۔
