اسلام آباد(این این آئی)ترجمان حکومتی مذاکراتی کمیٹی عرفان صدیقی نے کہا ہے کہ پی ٹی آئی مذاکرات نہیں ڈی چوک میں پٹرول بموں کیلئے بنی ہے۔نجی ٹی وی کے پروگرام میں گفتگو کرتے ہوئے عرفان صدیقی نے کہا کہ تیسری نشست کے بعد اعلامیہ جاری کیا گیا تھا، پی ٹی آئی مذاکراتی کمیٹی نے7ورکنگ ڈے پر اتفاق کیا تھا، بیرسٹر گوہر نے بانی پی ٹی آئی سے ملاقات کے بعد مذاکرات کوختم کردیا۔انہوں نے کہا کہ سپیکرنے اعلامیے کی روشنی میں میٹنگ بلائی ہے، ہم سپیکرکی رائے کا احترام کرتے ہوئے میٹنگ میں جائیں گے، پی ٹی آئی مذاکراتی کمیٹی کا روزانہ نیا موقف ہوتا ہے۔ترجمان حکومتی مذاکراتی کمیٹی نے کہاکہ کبھی کہتے ہیں ٹی او آرزبتا دیں، حامد رضا نے ایبسولیٹلی ناٹ کہہ دیا ہے،مذاکرات میں ڈائیلاگ کے ذریعے چیزیں طے کی جاتی ہے۔عرفان صدیقی نے کہا کہ پی ٹی آئی کمیٹی والے مذاکرات میں کچھ اورباہرآکرکچھ اورکہتے ہیں ،انہوں نے مذاکرات کوسرکس بنا دیا ہے، اگریہ میٹنگ میں آئیں گے تو تیارکیا ہوا جواب دیں گے، پی ٹی آئی مذاکرات نہیں ڈی چوک میں پٹرول بموں کیلئے بنی ہے۔انہوںنے کہاکہ پی ٹی آئی میں فیصلہ سازی کے عمل کا فقدان ہے، پی ٹی آئی نے جوپریس کانفرنس میں بتایا وہ میٹنگ میں نہیں کہا، ہوسکتا ہے کہ ہمارا جواب پی ٹی آئی کی خواہشات کے مطابق ہو، یہ فرسٹریشن کا شکارہیں۔ترجمان حکومتی مذاکراتی کمیٹی نے کہا کہ اب یہ سوچ رہے ہیں، اپوزیشن کوساتھ ملا کرڈی چوک آباد کریں گے،یہ اپنے مفاد کیلئے کچھ بھی کر سکتے ہیں، اگریہ امن وامان کا مسئلہ پیدا کریں گے تونمٹا جائیگا۔
