کراچی (این این آئی)اداکار شمعون عباسی نے بالی ووڈ اداکار سیف علی خان پر ہونے والے حملے پر سوال اٹھا دیئے۔فیس بک پر اداکار نے پوسٹ شیئر کرتے ہوئے سیف علی خان پر ہونے والے حملے کو عجیب و غریب اور اعصاب شکن قرار دے دیا۔انہوں نے مختلف پوسٹ شیئر کرتے ہوئے حیرت کا اظہار کیا اور لکھا کہ عام طور پر میں بالی ووڈ کی خبروں پر توجہ نہیں دیتا لیکن یہ سیف علی خان کے کیس کی کہانی بے حد عجیب اور اعصاب شکن ہے۔ پہلا بیان اگلے بیان سے بالکل میل نہیں کھاتا۔انہوں نے لکھا کہ اب سیف علی خان جن کی ریڑھ کی ہڈی کے قریب زخم آیا تھا، لیلاوتی ہسپتال سے 5دن کے بعد ایسے باہر نکل آئے ہیں جیسے کچھ ہوا ہی نہ ہو؟سوشل میڈیا پر اداکار کے خیالات پر مبنی پوسٹ وائرل ہوئی تو انہوں نے نئی پوسٹ شیئر کرتے ہوئے اس پر وضاحت دی اور لکھا کہ جس طرح سے بھارتی اداکار و اہل خانہ تفصیلات بتانے سے انکار کر رہے ہیں، یہ ان لوگوں کیلئے باعث بے عزتی ہے جو کئی دہائیوں سے انہیں پسند کرتے ہیں اور یوں لگتا ہے کہ بھارتی حکومت اس معاملے میں مکمل اندھیرے میں ہے۔
