بیجنگ (این این آئی)ترجمان چینی وزارت خارجہ نے کہاہے کہ چین غزہ جنگ بندی معاہدے پر عمل درآمد کی حمایت کرتا ہے، امید ہے جنگ بندی معاہدے پر موثر طریقے سے عمل درآمد ہو گا۔چینی میڈیاکے مطابق چینی وزارت خارجہ کے ترجمان گو جیاکھون نے یومیہ پریس کانفرنس میں اسرائیل اور حماس کے درمیان طے پانے والی غزہ جنگ بندی کے معاہدے پر کہا کہ چین غزہ جنگ بندی اور قیدیوں کے تبادلے کے معاہدے کا خیرمقدم کرتا ہے اور امید کرتا ہے کہ اس معاہدے کو موثر طریقے سے نافذ کیا جا سکے گا اور غزہ میں مکمل اور مستقل جنگ بندی حاصل ہوگی۔ترجمان نے کہا کہ چین جنگ بندی معاہدے پر عمل درآمد کی حمایت کرتا ہے اور غزہ کو انسانی امداد فراہم کرنے اور جنگ کے بعد تعمیر نو کے دوبارہ شروع کرنے میں مثبت کوششیں جاری رکھے گا،امید ہے کہ تمام متعلقہ فریق غزہ جنگ بندی کے موقع سے فائدہ اٹھاتے ہوئے علاقائی کشیدگی میں کمی کو فروغ دیں گے،چین بین الاقوامی برادری کے ساتھ مل کر مشرق وسطی میں امن و استحکام کے فروغ کے لیے مسلسل کوششیں کرے گا۔
