اسلام آباد(این این آئی)محکمہ موسمیات نے (آج) اتوار کو ملک کے بیشترعلاقوں میں موسم سرد اور خشک جبکہ پہاڑی علاقوں میں صبح، رات کے اوقات میں شدید سرد رہنے کا امکان ظاہر کیا ہے۔ بیان کے مطابق کشمیر، مری، گلیات اور گردونواح میں چند مقامات پر تیز ہوائوں اور گرج چمک کیساتھ بارش اور پہاڑوں پر ہلکی برفباری کی توقع ہے۔محکمہ موسمیات کے مطابق صبح، رات کے اوقات میں پنجاب کے میدانی اضلاع میں درمیانی سے شدید دھند چھائے رہنے کی توقع ہے۔رپورٹ کے مطابق ہفتے کو ملک کے بیشتر علاقوں میں موسم سرد اور خشک جبکہ پہاڑی علاقوں میں شدید سرد رہا، پنجاب کے چند مشرقی اور وسطی اضلاع میں درمیانی سے شدید دھند چھائی رہی، تاہم میرپور خاص میں 1ملی میٹر بارش ہوئی۔ہفتے کو کم سے کم درجہ حرارت لہہ منفی 13، پاراچنار منفی 12، استور منفی 11، گوپس منفی 10، سکردو منفی 9، کالام منفی 7اور ہنزہ میں منفی 6سینٹی گریڈ ریکارڈ کیا گیا۔
