اسلام آباد (این این آئی)سربراہ سنی اتحاد کونسل صاحبزادہ حامد رضا نے کہا ہے کہ پی ٹی آئی مذاکراتی کمیٹی (آج) اتوار یا (کل)سوموار کو تیسرے اجلاس کیلئے تیار ہے، تیسرے اجلاس میں جوڈیشل کمیشن تشکیل نہ دیا گیا تو مذاکراتی عمل معطل ہو جائیگا ،بانی پی ٹی آئی سے کھلے ماحول میں ملاقات قانون کے مطابق ممکن ہے۔سربراہ سنی اتحاد کونسل صاحبزادہ حامد رضا نے اپوزیشن کے سپیکر سے رابطے کے معاملے اور عرفان صدیقی کے بیان پر ردعمل کا اظہار کرتے ہوئے کہا ہے کہ عمر ایوب نے سپیکر سے ٹیلی فونک رابطہ کی کوشش کی مگررابطہ نہ ہوسکا، اسپیکر قومی اسمبلی کو بذریعہ میسج آگاہ کردیا گیا ہے۔ انہوں نے کہا کہ اپوزیشن مذاکراتی کمیٹی اتوار 12 جنوری یا سوموار 13جنوری کو تیسرے اجلاس کیلئے تیار ہے۔ مذاکراتی کمیٹیوں کے دوسرے اجلاس میں بانی پی ٹی آئی سے ملاقات کی یقین دہانی کروائی گئی تھی۔انہوں نے کہا کہ حکومتی کمیٹی بانی پی ٹی آئی سے ملاقات کرانے میں مکمل طور پر ناکام رہی ہے، سپیکر قومی اسمبلی قوم کو آگاہ کریں حکومت اپنی کمٹمنٹ پوری کرنے میں ناکام ہوئی۔ انہوں نے کہا کہ بانی پی ٹی آئی سزا یافتہ قیدی نہیں بلکہ ان کی حیثیت انڈر ٹرائل سپیریئر کلاس قیدی کی ہے، قانون کے مطابق بانی پی ٹی آئی کا استحقاق ہے کہ انڈر ٹرائل قیدی سے ملاقات آزادانہ ماحول میں ہونی چاہئے۔ انہوں نے کہا کہ سیکیورٹی انتظامات میں بانی پی ٹی آئی سے کھلے ماحول میں ملاقات قانون کے مطابق ممکن ہے، تیسرے اجلاس میں جوڈیشل کمیشن تشکیل نہ دیا گیا تو مذاکرات کا عمل معطل ہوجائے گا، پی ٹی آئی مذاکراتی کمیٹی اجلاس میں اپنے مطالبات تحریری صورت میں جمع کروا دے گی۔
