سلمان خان کے گھر پر سیکیورٹی کے حوالے سے بڑا اقدام کر لیا گیا

ممبئی (این این آئی)بالی ووڈ سپر اسٹار سلمان خان کے گھر پر سیکیورٹی کے حوالے سے بڑا اقدام کر لیا گیا۔بھارتی میڈیا کے مطابق کئی مرتبہ جان سے مارنے کی دھمکیاں ملنے کے بعد اب سلمان خان نے اپنے ممبئی میں واقع گھر کی سیکیورٹی کے حوالے سے سخت اقدامات کیے ہیں۔میڈیا رپورٹس کے مطابق سلمان خان کے گلیکسی اپارٹمنٹ میں بلٹ پروف شیشے اور کرنٹ والی باڑ لگا دی گئی ہے۔سلمان خان کے گھر کے باہر یہ سیکیورٹی اقدامات بھارتی سیاستدان بابا صدیق کے قتل کے بعد دیکھنے میں آئے ہیں۔سوشل میڈیا پر بھی سلمان خان کے گھر کے باہر کی تصاویر سامنے آ گئیں جن میں سیکیورٹی اقدامات کو دیکھا جا سکتا ہے۔علاوہ ازیں سلمان خان کے مہاراشٹرا میں واقع فارم ہائوس کی سیکیورٹی بھی بڑھا دی گئی ہے۔بھارتی میڈیا کے مطابق حکومت کی جانب سلمان کو (Y-plus) سیکیورٹی فراہم کی گئی ہے اور پولیس کی گاڑی بھی ان کے ساتھ ہوتی ہے۔واضح رہے کہ سلمان خان کو لارنش بشنوئی گینگ کی جانب سے کئی مرتبہ قتل کی دھمکیاں موصول ہو چکی ہیں جبکہ گزشتہ سال ان کے گھر پر فائرنگ بھی کی گئی تھی۔