اسلام آباد(این این آئی)مسلم لیگ (ن)کے سینئر رہنما سینیٹر طلال چوہدری نے کہاہے کہ سیاسی، معاشی اور اخلاقی گراوٹ کی ذمہ دار پی ٹی آئی ہے،ان کا قبل از وقت انتخابات کا مطالبہ مضحکہ خیز ہے،بات چیت پر یقین رکھنا ہماری سیاسی تربیت ہے۔مسلم لیگ (ن)کے سینئر رہنما سینیٹر طلال چوہدری نے عمر ایوب اور شبلی فراز کی پریس کانفرنس پر ردعمل دیتے ہوئے کہاکہ پی ٹی آئی کی ہزاروں خواہشیں ایسی ہیں کہ ہر خواہش پر دم نکلے،اپنا حساب دو اور پھر اپنی راہ لو، نہ کوئی گلہ اور نہ کوئی ناراضگی۔ سینیٹر طلال چوہدری نے کہاکہ پی ٹی آئی کے دور میں ملک کا آوے کا آوہ ہی بگڑا ہوا تھا،پی ٹی آئی اپنی مظلومیت کے گیت گا رہی ہے جو اس کا وطیرہ ہے۔انہوںنے کہاکہ موجودہ حکومت عوام کا انتخاب ہے، پی ٹی آئی ایسے خواب دیکھنا چھوڑ دے جس میں اسے شرمندگی کا سامنا کرنا پڑے۔ طلال چوہدری نے کہاکہ پی ٹی آئی اپنے کئے پر پردہ نہیں ڈال سکتی، سیاسی، معاشی اور اخلاقی گراوٹ کی ذمہ دار پی ٹی آئی ہے۔لیگی سینیٹرنے کہاکہ وہ کون تھا جس نے اپوزیشن کے میثاق معیشت کو رد کیا تھا؟وہ کون تھا جو آئی ایم ایف کیساتھ معاہدے کی خلاف ورزی کرتے ہوئے پٹرول، ڈیزل اور بجلی کی قیمتوں پر اثر انداز ہوا؟وہ کون تھا جو دوست اسلامی ممالک کیساتھ تعلقات خراب ہونے کا سبب بنا؟ ۔طلال چوہدری نے کہاکہ وہ کون تھا جس نے اقتدار سے ہٹے کے بعد ملک کو تباہی کی جانب دھکیلنے کی خاطر آئی ایم ایف کو قرضہ نہ دینے کا مشورہ دیا؟وہ کون تھا جس نے اپنے غلط فیصلوں سے پاکستان کو تنہاکرنے کی کوشش کی؟ ۔انہوںنے کہاکہ وہ کون سی جماعت تھی جس نے نو مئی کو دنگا فساد کیا؟ یاد رکھیں جو بویا جائے گا وہی کاٹنا ہوگا۔ طلال چوہدری نے کہاکہ پی ٹی آئی کا قبل از وقت انتخابات کا مطالبہ مضحکہ خیز ہے۔ انہوںنے کہاکہ بانی چیئرمین پی ٹی آئی سے ملاقات کریں، مشاورت کریں، یہ آپ کا قانونی حق ہے لیکن اس کی آڑ میں سیاست نہ کریں،ہم بات چیت پر یقین رکھتے ہیں، یہی ہماری سیاسی تربیت ہے۔
