اسلام آباد(این این آئی)صدر آصف علی زرداری نے خیبر پختونخوا میں مختلف آپریشنز کے دوران 13خوارج کو جہنم واصل کرنے پر سکیورٹی فورسز کو خراج تحسین پیش کرتے ہوئے اس عزم کا اعادہ کیا ہے کہ دہشت گردی کی لعنت کے مکمل خاتمے تک کارروائیاں جاری رکھیں گے۔ جاری بیان میںصدر آصف علی زرداری نے کامیاب کارروائیوں کے دوران 13خوارج کو ہلاک کرنے پر سکیورٹی فورسز کی بہادری کو سراہا۔ صدر مملکت نے شمالی وزیرستان میں دہشت گردوں کا بہادری سے مقابلہ کرتے ہوئے جام شہادت نوش کرنے پر میجر محمد اویس شہید کو خراج عقیدت پیش کیا اور میجر محمد اویس شہید کی بہادری اور جذبہ حب الوطنی کو سراہا۔ صدر مملکت نے میجر محمد اویس شہید کے ورثا سے اظہار تعزیت کیا اور شہید کیلئے بلندی درجات اور اہل خانہ کیلئے صبر جمیل کی دعا کی ۔ صدر مملکت نے ملک سے فتن الخوارج کے مکمل خاتمے تک کارروائیاں جاری رکھنے کے عزم کا اظہار کیا اور کہا کہ پوری قوم دہشت گردی کے خلاف جنگ میں اپنی فورسز کے ساتھ ہے۔ صدر مملکت نے کہا کہ دہشت گردی کی لعنت کے مکمل خاتمے تک کارروائیاں جاری رکھیں گے۔