اسلام آباد (این این آئی)سینیٹ قائمہ کمیٹی برائے خزانہ نے ٹیکس قوانین ترمیمی بل پر غور کیلئے 24دسمبر کو اجلاس طلب کرلیا، نان فائلر کو نااہل قرار دینے، گاڑی و جائیداد خریدنے، بینک اکانٹ کھولنے پر پابندی کی تجاویز دی گئی ہیں۔نجی ٹی وی کے مطابق مجوزہ بل میں نان فائلر کو نااہل شخص کا درجہ دینے کی تجویز اور فائلرز سے حقیقی آمدن و اخراجات کے مطابق ٹیکس وصولی کا پلان ہے۔مجوزہ بل میں نان فائلر کیلئے گاڑی اور جائیداد خریدنے پر پابندی ہوگی جبکہ نان فائلر، بینک اکائونٹ بھی نہیں کھول سکیں گے ،کمرشل بینک اپنے اکاونٹ ہولڈرز کی تمام تفصیلات ایف بی آر سے شیئر کریں گے۔مجوزہ بل کے مطابق ایف بی آر ٹیکس دہندگان کا ڈیٹا بینکوں اور آڈیٹرزکو فراہم کرنے کا مجاز ہوگا، بزنس کی رجسٹریشن نہ کرانے والے نان فائلرز کی پراپرٹی سیل، اکائونٹ منجمد ہوگا جبکہ فائلر کے والدین، اہل خانہ، بیٹا، بیوی یا معذورفیملی ممبر فائلر تصور ہوگا۔
