ابوظہبی(این این آئی)متحدہ عرب امارات کے مرکزی بینک کے سونے کے ذخائر 2024 کی تیسری سہ ماہی کے اختتام پر 23 ارب درہم سے تجاوز کر گئے، جو گزشتہ ماہ کے مقابلے میں 5.3 فیصد اضافہ ظاہر کرتے ہیں۔عرب ٹی وی کے مطابق مرکزی بینک کے سونے کے ذخائر 2024 کی تیسری سہ ماہی کے اختتام پر 23 ارب درہم سے تجاوز کر گئے، سال کے آغاز سے اب تک یہ ذخائر 27.76 فیصد یا 5 ارب درہم سے زیادہ بڑھے ہیں۔مرکزی بینک کے ماہانہ شماریاتی بلیٹن کے مطابق، ڈیمانڈ ڈپازٹس میں بھی 3 فیصد سے زائد کا اضافہ ہوا، جس کے بعد یہ 1.083 ٹریلین درہم سے تجاوز کر گئے، جن میں 781.528 ارب درہم مقامی کرنسی میں ہیں۔بینکاری شعبے میں جمع کرائی گئی رقوم میں بھی نمایاں اضافہ ہوا ہے، جس میں سیونگز ڈپازٹس 304.534 ارب درہم جبکہ ٹائم ڈپازٹس 888.473 ارب درہم تک پہنچ گئے ہیں۔مزیدبراں، متحدہ عرب امارات کے بینکاری شعبے کے خالص بین الاقوامی ذخائر بھی بڑھ کر 1.317 ٹریلین درہم تک پہنچ گئے ہیں، جو گزشتہ سال کے اختتام کے مقابلے میں 15 فیصد اضافہ ظاہر کرتے ہیں۔سال کے ابتدائی 9مہینوں میں یو اے ای فنڈ ٹرانسفر سسٹم کے ذریعے ہونے والے لین دین کی مالیت 14.338 ٹریلین درہم سے تجاوز کر گئی۔
