اسلام آباد(این این آئی)صدر مملکت آصف علی زرداری سے پاکستان میں چین کے سفیر چیانگ زئے ڈونگ نے ملاقات کی ،ملاقات میں دونوں برادر ممالک کے درمیان دوطرفہ تعاون بڑھانے پر تبادلہ خیال کیا گیا ۔ ملاقات میں سینیٹر سلیم مانڈوی والا اور سرکاری حکام نے بھی شرکت کی۔ ملاقات کے دوران فریقین نے دو طرفہ اہمیت کے امور پر تبادلہ خیال کیا۔ چینی سفیر نے صدر مملکت کی صحتیابی پر خوشی، چینی قیادت کی جانب سے نیک خواہشات کا اظہار کیا۔چینی سفیر نے چینی صدر شی چن پنگ کی جانب سے صدر آصف علی زرداری کیلئے نئے سال کی مبارکباد کا کارڈ بھی پیش کیا ۔چینی سفیرنے امیدظاہرکی کہ صدر آصف علی زرداری دوطرفہ تعلقات مزید مضبوط بنانے کیلئے جلد چین کا دورہ کریں گے۔ ملاقات میں مختلف شعبوں میں پاک-چین تعاون بڑھانے کے عزم کا اعادہ کیا گیا ۔
