قاہرہ(این این آئی)نائب وزیراعظم و وزیرخارجہ اسحق ڈار نے کہا ہے کہ غزہ میں صورتحال مزید ابتر ہوچکی ہے، بنان اور شام میں جاری جارحیت تشویش ناک ہے، پاکستان فوری طور پر اور بلا مشروط طور پر جارحیت کے خاتمے کا مطالبہ کرتا ہے۔مصر کے درالحکومت میں 8ترقی پذیر ممالک کی تنظیم (ڈی 8)کے وزراء کونسل اجلاس سے خطاب کرتے ہوئے کہاکہ اجلاس میں رکن ممالک کے ساتھ میری موجودگی اعزاز کی بات ہے، میزبانی کیلئے مصر کا شکریہ ادا کرتا ہوں۔انہوں نے کہاکہ مصر کی جانب سے شاندار میزبانی نے اقتصادی تعاون بڑھانے کے طریقہ کار پر بات چیت کیلئے سازگار ماحول فراہم کیا ہے، ہم مصر کو ڈی 8ممالک کے نئے سربراہ کے طور پر خوش آمدید کہتے ہیں، ترقی اور خوشحالی کیلئے ساتھ ملکر کام کرنے کیلئے پرعزم ہیں۔اسحق ڈار نے کہاکہ پرامید ہوں کہ اجلاس سے تمام رکن ممالک مستحکم ہوں گے، بنگلادیش نے گزشتہ 3سال میں ڈی 8کی عمدہ انداز میں سربراہی کی، بنگلادیش کی کوششوں سے رکن ممالک میں تعاون اور ترقی کو فروغ ملا۔ وزیرخارجہ نے کہا کہ افسوس کیساتھ غزہ کی صورتحال ابتر ہوتی جارہی ہے جہاں بڑی تعداد میں لوگوں کو شہید کیا گیا ہے، لبنان اور شام میں جاری جارحیت تشویش ناک ہے، پاکستان فوری طور پر اور بلا مشروط طور پر جارحیت کے خاتمے کا مطالبہ کرتا ہے۔اسحق ڈار نے کہا کہ ڈی 8وزراء کونسل اجلاس مشرق وسطی میں انسانی بحران سے نمٹنے کے حل پر تبادلہ خیال کرنے کیلئے ایک اہم فورم ہے، پاکستان ڈی 8ممالک کے درمیان اقتصادی تعاون کو بڑھانے اور تجارت کیلئے پرعزم ہے۔
