واشنگٹن(این این آئی)امریکہ کے نو منتخب صدر ڈونلڈ ٹرمپ اور پڑوسی ملک میکسیکو کی صدر کلاڈیا شئین بام کے درمیان ٹیلیفونک رابطے کے بعد دونوں طرف کے بیانات میں مختلف موقف اختیار کیا گیا ہے۔غیرملکی خبر رساں ایجنسی کے مطابق ڈونلڈ ٹرمپ نے کہا کہ میکسیکو کی صدر نے اس بات اتفاق کیا ہے کہ وہ اپنے ملک سے امریکہ کی طرف جانے والے پناہ گزینوں کو روکیں گی تاہم میکسیکن صدر نے اس کے بعد سوشل میڈیا پلیٹ فارم ایکس پر اپنے بیان میں کہا کہ میکسیکو کی پوزیشن یہ ہے کہ سرحدیں بند نہیں کی جاتیں۔دونوں طرف سے جاری بیانات میں اس کال کو مثبت طور پر پیش کیا گیا کہ باوجود اس کے کہ نومنتخب صدر ٹرمپ کی جانب سے پیر کو میکسیکو پر 25 فیصد ٹیرف لگانے کی دھمکی کے بعد میکسیکو کی حکومت کی جانب سے جوابی کارروائی کی وارننگ دی گئی۔ڈونلڈ ٹرمپ نے اپنے ٹروتھ سوشل پلیٹ فارم پر کہا کہ ابھی میکسیکو کے نئے صدر کے ساتھ زبردست بات چیت ہوئی۔انہوں نے پڑوسی ملک کی پالیسی میں تبدیلی کا اشارہ کرتے ہوئے کہا کہ وہ میکسیکو سے امریکہ کی طرف ہجرت کو روکنے پر رضامند ہو گئی ہے، اور ہماری جنوبی سرحد کو موثر طریقے سے بند کر رہی ہیں۔
