اسلام آباد(این این آئی)وفاقی وزیر برائے پیٹرولیم سینیٹر مصدق ملک نے کہا ہے کہ پی ٹی آئی پر پابندی کیلئے اتحادی جماعتوں سے مشاورت کریں گے ، رینجرز اور پولیس اہلکاروں کو شہیدکرنے والی جماعت کی سزا کیا ہو گی ؟ دہشت گردی کیخلاف آپریشن پر پی ٹی آئی نے کہا آپریشن ہواتو ایسی کی تیسی کر دیں گے۔ نجی ٹی وی کے پروگرام میںگفتگو کرتے ہوئے انہوںنے کہاکہ پی ٹی آئی نے 9مئی سانحہ کیا اور بھی پر تشدد کام کیے، پی ٹی آئی پر پابندی لگانے کا مجھے علم نہیں ہے، مشاورت کیلئے ہماری اور دیگر اتحادی جماعتیں بیٹھیں گی اور دیکھیں گی کہ پی ٹی آئی نے کیا کیا ہے۔ انہوں نے کہاکہ پی ٹی آئی کے پر تشدد اقدامات کا جائزہ لیا جائے گا، یہ وہی لیڈر شپ ہے جس نے کہا تھا کہ ہمیں کوئی نہیں روک سکتا، یہ کہہ رہے تھے کہ ہم جیل توڑیں گے۔ انہوں نے کہا کہ جس جماعت نے 4رینجرز اور پولیس اہلکاروں کو شہید کیا ہو اس کی سزا کیا ہو گی ؟۔ وفاقی وزیر نے کہا کہ کیا سیاسی جماعت کو مجرمانہ کارروائیاں معاف ہیں؟ کیا گولی مارنے والوں کو چھوڑ دیں ؟ سیاسی جماعت کو مجرمانہ کارروائیوں کی اجازت تو نہیں ہوتی، پھر رٹ آف دی اسٹیٹ کبھی نہ کبھی تو قائم کرنی ہی پڑے گی ناں۔انہوںنے کہا کہ پولیس کے پاس تو اسلحہ ہوتا ہے لیکن یہ سویلین کے پاس اسلحہ کیسے آ گیا؟ کیا کبھی سنا کہ سویلین نے پولیس والوں کو گولیاں مار کر شہید کر دیا ؟۔انہوں نے کہا کہ پی ٹی آئی والے صوبائیت پھیلا رہے ہیں، ہم نے دہشت گردی کیخلاف آپریشن کی بات کی تو پی ٹی آئی نے مخالفت کی اور کہا کہ اگر دہشت گردی کیخلاف آپریشن کیا تو ایسی کی تیسی کر دیں گے۔
