کراچی (این این آئی) اداکارہ ماہرہ خان نے کہا ہے کہ میرے نزدیک دنیا میں کوئی بھی شخص مکمل طور پر سیلف میڈ نہیں ہوسکتا،کامیابی حاصل کرنے میں ہمیشہ خاندان، دوستوں اور دیگر لوگوں کا تعاون شامل ہوتا ہے۔ سوشل میڈیا پر وائرل ویڈیو میں دیکھا جاسکتا کہ اداکارہ نے ایک تقریب کے اختتام پر گفتگو کرتے ہوئے کہا کہ سیلف میڈ صرف کہنے کی حد تک اچھا لگتا ہے، لیکن حقیقت میں ایسا کچھ نہیں ہوتا، انہوں نے واضح کیا کہ میں اپنی کامیابی کا سہرا اپنے والدین، بھائی، بیٹے، دوستوں، اور ساتھ کام کرنے والے افراد کو دیتی ہوں اگر یہ سب ان کو سپورٹ نہ کرتے تو آج وہ ایک اسٹار نہ ہوتی۔ ماہرہ خان نے کہا کہ میں آج جس مقام پرہوں اس میں خاندان اور دوستوں کیساتھ ساتھ نئے ساتھیوں اور پیشہ ورانہ تعلقات کا بھی اہم کردار ہے۔ اداکارہ نے کہا کہ سیلف میڈ کا تصور حقیقت سے زیادہ ایک خوبصورت خیال ہے۔انہوں نے کہاکہ ہر فرد کسی نہ کسی کی مدد اور سہارے کے ذریعے ہی کامیابی حاصل کرتا ہے کوئی بھی تنہا دنیا میں بڑا مقام یا کامیابی حاصل نہیں کر سکتا۔
