لاہور ( این این آئی)پنجاب پولیس دہشت گردوں، ڈاکوؤں اور شر پسندوں کے خاتمے کے لئے پرعزم اور مسلسل مصروف عمل ہے، دشوار گزار، پہاڑی علاقوں، گنجان آبادیوں اور کچہ ایریاز میں ملک و سماج دشمن عناصر کے خلاف ڈرون ٹیکنالوجی استعمال کی جائے گی۔آئی جی پنجاب ڈاکٹر عثمان انور نے کہاکہ ایمونیشن لے جانے اور گرانے والے ڈرون دہشت گرد و شر پسند عناصراورڈاکوؤں کے خلاف موثر کاروائیوں کا ذریعہ بننے کے ساتھ ساتھ لا اینڈ آرڈر کنٹرول، ٹریفک مینجمنٹ، سمارٹ پولیس کے حوالے سے ڈرونز ٹیکنالوجی بے حد معاون ثابت ہوسکتی ہے۔ آئی جی پنجاب ڈاکٹر عثمان انور نے کہاکہ ڈرونز کے ذریعے شر پسند عناصر کی نقل و حرکت کی مانیٹرنگ اور قلع قمع کیلئے پیشگی اقدامات کیے جا سکتے ہیں،ڈرون ٹیکنالوجی سے وسیع ایریا کی فضائی سرویلنس، سکیورٹی و ٹریفک اقدامات بھی یقینی بنانا ممکن ہے۔ آئی جی پنجاب نے کہاکہ بین الصوبائی چوکیوں پر دہشت گردوں کے بڑھتے حملوں کے پیش نظر ڈرون ٹیکنالوجی کا حصول وقت کی اہم ضرورت ہے۔ کچہ ایریا اور دریائی دلدلی علاقوں میں ڈاکوؤں اور شرپسندوں کے خاتمے کے لئے اسلحہ بردار ڈرونز کا حصول زیر غور ہے۔ان خیالات کا اظہار انہوں نے سنٹرل پولیس آفس میں واہ انڈسٹریز لمیٹڈ کے اعلیٰ سطح کے وفدسے ملاقات کے دوران کیا۔چیف ٹیکنیکل آفیسر بریگیڈیئر (ر) خرم قادری، جنرل مینیجر سیلز ساجد محمود، سینئر مینیجر آپریشنز شیخ عبدالوہاب وفد میں شامل تھے،۔وفد نے آئی جی پنجاب کو ادارہ کے تیار کردہ مختلف ڈرونز اور ان کی صلاحیتوں بارے آگاہ کیا۔ آئی جی پنجاب نے وفد کو دہشت گردوں، ڈاکوؤں کے خلاف موثر کاروائی کیلئے فورس کی ضروریات سے آگاہ کیا اور جدید سرویلنس و مانیٹرنگ سسٹم اور اسلحہ سے لیس ڈرونز کے حصول میں دلچسپی کا اظہار کیا۔ ایڈیشنل آئی جی لاجسٹکس ایڈیشنل پروکیورمنٹ عمران محمود، ڈی آئی جی آپریشنز پنجاب وقاص نذیر، اے آئی جی ڈویلپمنٹ اینڈ لاجسٹکس صاحبزادہ بلال عمر اور اے آئی جی پروکیورمنٹ کرار حسین اجلاس میں موجود تھے۔ ملاقات کے اختتام پر آئی جی پنجاب ڈاکٹر عثمان انور نے وفد کو صوبے کے پولیس سٹیشنز کی اپ گریڈیشن پر مبنی کتاب ” تھانے پنجاب دے” پیش کی۔
