بیجنگ (این این آئی)چینی صدر شی جن پھنگ نے برازیل کے مختلف حلقوں سے وابستہ دوست شخصیات کے نام جوابی خط میں ان کی حوصلہ افزائی کی کہ وہ چینـبرازیل دوستی کے نصب العین کیلئے اپنا مثبت کردار جاری رکھیں۔چینی میڈ یا کے مطا بق شی جن پھنگ نے کہا کہ سفارتی تعلقات کے قیام کے گزشتہ 50 سالوں میں چین اور برازیل ہاتھ میں ہاتھ ملا کر آگے بڑھے ہیں اور پہاڑوں اور سمندروں کے طویل فاصلے کے باوجود اچھے دوست بن گئے ہیں۔ چین دونوں ممالک کے درمیان دوستی کے موضوعات کو مسلسل فروغ دینے کے لئے برازیل کے ساتھ مل کر کام کرنے کیلئے تیار ہے تاکہ چین برازیل تعلقات بڑے ترقی پذیر ممالک کے درمیان یکجہتی ، تعاون ، مشترکہ ترقی اور باہمی فائدے کی مثال بن سکیں اور انسانیت کے لئے امن و ترقی کے نصب العین کے لئے مزید خدمات سرانجام دی جا سکیں۔شی جن پھنگ نے اس امید کا اظہار کیاکہ دونوں ممالک میں زندگی کے تمام شعبوں سے تعلق رکھنے والے افراد چین برازیل تعلقات کی مسلسل ترقی کو فروغ دینے میں مثبت کردار ادا کریں گے تاکہ چین برازیل دوستی دریائے یانسی اور دریائے ایمیزون کی طرح رواں رہے۔
