لاہور ( این این آئی سیکرٹری محکمہ تحفظ ماحول راجہ جہانگیر نے کہا ہے کہ شملہ پہاڑی کو سموگ ہاٹ اسپاٹ قرار دے کر گرین لاک ڈاؤن اقدامات کا آغاز کر دیا گیا ہے۔ علاقے میں صفائی اور ماحول کی بہتری کے لیے خصوصی ویٹ سویپنگ کا انتظام کیا گیا ہے تاکہ بغیر دھول مٹی کے صفائی کی جا سکے۔ متعلقہ عملے کو ہدایات دی گئی ہیں کہ یہ عمل دن بھر شفٹوں میں جاری رہے۔سموگ کے اثرات کو کم کرنے کے لیے سڑکوں پر جراثیم کش پانی کا چھڑکاؤ بھی کیا جا رہا ہے۔ مزید براں، 42 کمرشل جنریٹرز کی انسپکشن مکمل کر لی گئی ہے، جس کے نتیجے میں 6 جنریٹرز کو سیل کیا گیا ہے۔ آٹھ فٹ اونچے 2000 پلانٹرز علاقے میں رکھے گئے ہیں، اور ان کی تعداد میں مزید اضافہ کیا جائے گا۔علاقے میں تجاوزات کے خاتمے کے لیے اسپیشل اسکواڈز تعینات کیے گئے ہیں، جنہوں نے مستقل اور عارضی تجاوزات کو ختم کر دیا ہے۔ تعمیراتی سرگرمیوں پر مکمل پابندی عائد کر دی گئی ہے، جس پر زیرو ٹالرنس پالیسی کے تحت سختی سے عمل درآمد کیا جا رہا ہے۔ ہیوی ٹرانسپورٹ کے داخلے پر بھی پابندی عائد کر دی گئی ہے اور بڑے تین پارکنگ اسٹینڈز کو گرین زون سے باہر منتقل کیا گیا ہے۔گرین لاک ڈاؤن کے تحت نافذ اقدامات کی کسی بھی خلاف ورزی یا مسئلے کی فوری رپورٹ محکمہ تحفظ ماحول کو 1373 پر کر سکتے ہیں۔ سیکرٹری محکمہ تحفظ ماحول راجہ جہانگیر انور نے شہریوں سے تعاون کی اپیل کی ہے تاکہ سموگ پر قابو پایا جا سکے اور ماحول کو بہتر بنایا جا سکے۔
