نارووال ( این این آئی)وفاقی وزیر منصوبہ بندی وترقی احسن اقبال نے کہا ہے کہ ہمارے مخالفین کی کارکردگی لوگوں کے سامنے ہے،ہمیں ورثے میں تباہی ملی اب عوام کو تعمیری اور تخریبی سیاست کا فرق محسوس ہوگیا ہے۔ان خیالات کا اظہار انہوں نے جسڑ بائی پاس پر نارووال کی تاریخ کے پہلے ڈانسنگ فائونٹین کا افتتاح کے موقع پر میڈیا سے گفتگوکرتے ہوئے کیا۔وفاقی وزیر احسن اقبال نے کہاکہ وزیراعلی پنجاب مریم نواز کے وژن کو عملی جامہ پہنانے کیلئے ڈی سی نارووال اور ان کی پوری ٹیم دن رات پوری محنت اور لگن سے کام کررہی ہے ،اچھی ٹیم ہو تو اچھے نتائج برآمدہوتے ہیں ،ہمارے کام اور ہمارے مخالفین کی کارکردگی لوگوں کے سامنے ہے،ہمیں ورثے میں تباہی ملی تھی مگر آج ہر طرف تعمیر و ترقی کا سماں ہے۔انہوںنے کہا کہ مریدکے نارووال روڈ اور نیو لاہور روڈ پر کام شروع ہوگیا ہے ،شہر کے اندر مختلف تفریحی منصوبوں پر کام شروع ہوگیا ہے،کرتارپور ٹو سیالکوٹ روڈ بھی مکمل ہوچکا ہے ،شکرگڑھ میں سالوں سے التوا ء کے شکار منصوبوں پر آج کام تیزی سے جاری ہے،یہ مسلم لیگ (ن) کی حکومت کا کمال ہے کہ وہ جب اقتدار میں آتی ہے ترقی کے منصوبے شروع ہوجاتے ہیں۔ احسن اقبال نے کہا کہ گالی گلوچ بریگیڈ کے لیڈر کی تربیت صرف اتنی ہے کہ شہدا ء کا مذاق کس طرح اڑانا ہے اور اپنے ملک کے اداروں کا مذاق کس طرح اڑانا ہے،اب لوگوں کو تعمیری اور تخریبی سیاست کا فرق محسوس ہوگیا ہے۔
