لاہور( این این آئی)وزیراعظم محمد شہباز شریف نے کہا ہے کہ ملک میں بیرونی سرمایہ کاری کا فروغ حکومت کی اولین ترجیح ہے ،کاروباری اور تاجر برادری کو خصوصی سرمایہ کاری سہولت کونسل کے ون ونڈو آپریشن کے ذریعے بہترین سہولیات فراہم کی جا رہی ہیں ۔ وزیر اعظم شہباز شریف سے برطانیہ کی بااثر اور معروف کاروباری شخصیات کے وفد نے زبیر عیسی کی سربراہی میں لاہور میں ملاقات کی ،وفد میں برطانیہ کی سرکردہ کاروباری شخصیات شامل تھیں۔وزیر اعظم شہباز شریف نے وفد سے گفتگو کرتے ہوئے کہا کہ حکومت کی کوششوں سے حالیہ دنوں میں ملکی معیشت بہتری کی طرف گامزن ہوئی ہے جس سے سرمایہ کاروں کا اعتماد بڑھا ہے۔وزیراعظم شہباز شریف نے وفد کو پاکستان میںسرمایہ کاری کرنے کی ترغیب دی جبکہ اس موقع پر پاکستان اور برطانیہ کے درمیان بزنس ٹو بزنس تعلقات کو مزید بہتر بنانے کے حوالے سے تعاون کی نئی راہیں تلاش کرنے پر بھی تبادلہ خیال کیا گیا۔وفد نے ملکی معیشت کے استحکام اور پائیدار ترقی کی راہ پر گامزن ہونے پر وزیراعظم شہباز شریف کی معاشی پالیسیوں کی تعریف اور اعتماد کا اظہار کیا۔ علاوہ ازیںوزیر اعظم شہباز شریف نے سینئر لیگی رہنما طارق آفندی کی رہائشگاہ پر جا کر ان کے بھانجے کے انتقال پر اظہار افسوس اورمرحوم کے درجات کی بلندی کے لئے فاتحہ خوانی کی ۔رکن اسمبلی رانا مبشر اقبال، سینئر لیگی رہنما طلحہ برکی سمیت دیگر بھی وزیر اعظم شہباز شریف کے ہمراہ تھے۔
