میلبورن (این این آئی)پاکستان اور آسٹریلیا کے درمیان پہلا ون ڈے انٹرنیشنل (آج) پیر کو میلبرن میں کھیلا جائے گا۔پاکستان نے پہلے ون ڈے کیلئے پلیئنگ الیون کا اعلان کرد یا ہے ،محمد عرفان خان اور صائم ایوب ڈیبیو کریں گے۔ 21سالہ عرفان پہلے ہی پاکستان کے لیے تین ٹی ٹوئنٹی میچز کھیل چکے ہیں جبکہ انھوں نے لسٹ اے کے 24 میچز کھیلے ہیں جس میں ایک سنچری اور تین نصف سنچریاں اسکور کی ہیں، بائیں ہاتھ کے اوپننگ بیٹر صائم ایوب پاکستان کے لیے 6 ٹیسٹ اور 23 ٹی ٹوئنٹی کھیل چکے ہیں اور 35 لسٹ اے میچز میں انہوں نے چار سنچریاں اور سات نصف سنچریاں بنائی ہیں۔عامر جمال، عرفات منہاس، فیصل اکرم اور حسیب اللہ ون ڈے اسکواڈ میں شامل دیگر ان کیپڈ کھلاڑی ہیں۔ محمد رضوان ون ڈے انٹرنیشنل کپتان کی حیثیت سے پہلی بار آسٹریلیا کے خلاف میلبرن کرکٹ گرائونڈ میں داخل ہوں گے ۔پاکستان ٹیم تین ایک روزہ میچوں کی سیریز کے پہلے میچ میں میزبان آسٹریلیا کا مقابلہ کرے گی۔ دوسرا ون ڈے 8نومبر کو ایڈیلیڈ کے ایڈیلیڈ اوول میں کھیلا جائے گا۔ تیسرا ون ڈے 10 نومبر کو پرتھ کے پرتھ اسٹیڈیم میں کھیلا جائے گا۔ون ڈے سیریز کے بعد تین میچوں کی ٹی ٹوئنٹی سیریز ہوگی جس کے میچز 14، 16 اور 18 نومبر کو ہونگے۔واضح رہے کہ دونوں ٹیموں کے درمیان آخری ون ڈے میچ 20 اکتوبر کو آئی سی سی کرکٹ ورلڈ کپ 2023 کے دوران ہوا تھا جہاں آسٹریلیا نے پاکستان کو 62 رنز سے شکست دی تھی۔ آخری بار دونوں ٹیموں نے دو طرفہ ون ڈے سیریز مارچ/ اپریل 2022 میں پاکستان میں کھیلی تھی جو پاکستان نے 2-1 سے جیتی تھی۔کپتان محمد رضوان نے کہا کہ ہے کہ پاکستانی ٹیم کی قیادت کرنا اعزاز کی بات ہے اور ہم آسٹریلیا سے اسی کے ہوم گرائونڈ میں مقابلہ کرنے کیلئے تیار ہیں۔ ہم سب جانتے ہیں کہ آسٹریلیا ایک بہت اچھی ٹیم ہے اور عالمی چمپئن ہے لیکن ہم سخت مقابلہ کرنے کے منتظر ہیں کیونکہ ہمارے اسکواڈ میں کئی نوجوان اور پرجوش کھلاڑی شامل ہیں، یہ ان کے لیے آنے والے مواقعوں سے فائدہ اٹھانے کا آغاز ہے۔ہم نے میلبرن میں اپنی آمد کے بعد سے اچھے تربیتی سیشن کیے ہیں اور اب ہم سیریز کے شروع ہونے کا بے تابی سے انتظار کر رہے ہیں تاکہ ہم اپنی صلاحیتوں کا مظاہرہ کر سکیں۔ ہم اگلے سال پاکستان میں آئی سی سی چیمپئنز ٹرافی کی واپسی سے پہلے کافی ون ڈے میچز کھیلنے والے ہیں۔ آسٹریلیا سے شروع ہونے والی یہ سیریز پھر زمبابوے، جنوبی افریقہ اور ہوم سہ فریقی سیریز ہمیں میگا ایونٹ میں صحیح کامبی نیشن بنانے میں مدد دے گی۔ ہم توقع کر رہے ہیں کہ شائقین سیریز میں ہماری سپورٹ کے لیے اچھی تعداد میں آئیں گے کیونکہ ہم آسٹریلیا میں جہاں بھی کھیلے ہیں ٹیم کو ان کی سپورٹ حاصل رہی ہے۔دوسری جانب آسٹریلوی ون ڈے کپتان پیٹ کمنز نے کہا ہے کہ پاکستان کافی اچھی ٹیم ہے اور اس کے پاس ایسے کھلاڑی ہیں جنہوں نے بڑے رنز بنائے ہیں۔ ہم نے حالیہ برسوں میں ان کے خلاف کھیلا ہے اس لیے مجھے لگتا ہے کہ یہ ہمیشہ برابر کا میچ ہوتا ہے۔ کل ایم سی جی میں اچھا کراڈ ہوگا کیونکہ ہم پاکستان کے خلاف کھیل رہے ہیں۔
