اسلام آباد (این این آئی)پی ٹی آئی اندرونی طور پر انتشار کا شکار ہوگئی، پی ٹی آئی کے وکلاء رہنمائوں میں عہدوں کی جنگ عروج پر پہنچ گئی، سلمان اکرم راجہ نے فیصل چوہدری کو پی ٹی آئی کی لیگل ٹیم سے فارغ کر دیا، پی ٹی آئی کے مختلف وٹس ایپ گروپس سے بھی نکال دیا گیا۔ اس حوالے سے سلمان اکرم راجہ نے کہا ہے کہ فیصل چوہدری کو بانی چیئرمین سے ملاقات کے بعد میڈیا کے سامنے غیر ضروری باتیں نہیں کرنا چاہئیں تھیں۔ذرائع کے مطابق پارٹی کی قانونی ٹیم نے اپنا مرکزی گروپ انتظار پنجوتھہ کی گمشدگی کے بعد ڈی ایکٹو کر دیا تھا، فیصل چوہدری نے انتظار پنجھوتا کے اغوا کے بعد پی ٹی آئی کی قیادت پر تحفظات کا اظہارکیا تھا۔انہوں نے کہا تھا کہ مجھے بانی پی ٹی آئی عمران خان سے سچ بولنے کی سزا ملی ہے ،بانی اور کارکنان سے جھوٹ نہیں بول سکتا ،ڈی چوک پر احتجاج کے دوران اور ویسے جو کچھ ہوا اڈیالہ میں سب بتا دیا،مجھے بانی تحریک انصاف سے سچ بولنے کی سزا ملی ہے باقی کچھ نہیں۔
