نواز شریف کا ویژن عام آدمی کو عزت سے نوازنا ہے،اب بات ہوگی تو عوام کی ہوگی ‘ نائب صدر (ن) لیگ
سانگلہ ہل( این این آئی)پاکستان مسلم لیگ (ن) کے نائب صدر و سابق وفاقی وزیر چوہدری محمد برجیس طاہر نے کہا ہے کہ آئی ایم ایف کا یہ آخری پروگرام ہوگا ،شنگھائی تعاون تنظیم کی کامیابی اسلامی سربراہی مملکت کانفرنس 1974کے بعد کامیابی کے زینے پر منسلک ہے ،میاں نواز شریف کا ویژن عام آدمی کو عزت سے نوازنا ہے۔ انہوں نے صحافیوں سے گفتگو کرتے ہوئے کہا کہ شنگھائی تعاون تنظیم کی کامیابی کے بعد سٹاک مارکیٹ تاریخ کی بلند ترین سطح 85ہزار کراس کر گئی جوپہلے کم تھی،اس سے قبل مہنگائی کی شرح 38فیصدتھی جوکم ہوکر6فیصدپرآگئی ہے،یہ گراف پاکستان کے روشن مستقبل کی تازہ مثال ہے۔میاں نواز شریف کے ویژن پر عمل پیرا ہو کر وزیر اعلیٰ پنجاب مریم نوازشریف عوام کی محرومیوں کے ازالہ کے لیے ہر ممکن اقدامات کر رہی ہیں ،نوجوانوں کے لیے بہترین پروگرامز، بیرون ممالک نوکریاں ،زرعی گریجویٹ کے لئے انٹرن شپ اور یوتھ کے لیے دنیا بھر میں بہترین انتظامات پنجاب حکومت کے کار نمایاں کارکردگی کامنہ بولتا ثبوت ہے ۔ برجیس طاہر نے کہا کہ گزشتہ 11برس سے بھارت جس حد تک ہمیں نظر انداز کر رہا تھا بھارتی وزیر خارجہ کا موقف کھل کر سامنے آگیا ہے کہ تمام مسائل کا حل گفت وشنید ہے، کشمیر کے مسئلے سمیت تمام مسائل گفت و شنید سے حل ہوں گے،ہم چاہتے ہیں کہ مسئلہ کشمیر اقوام متحدہ کی قراردادوں کے عین مطابق حل ہونا چاہیے ،جنگ کے ذریعے کسی مسئلے کا حل نہیں ہو سکتا ،تین جنگیں لڑی جا چکی ہیں جس سے کوئی خاطرخواہ فوائد حاصل نہ ہو سکے ۔انہوں نے کہا کہ سابق وزیراعظم اٹل بہاری واجپائی نے میاں نواز شریف سے لاہور آمدپر وعدہ کیا تھا کہ کشمیر کا مسئلہ مل جل کر حل کریں گے کیونکہ کسی مسئلے کا حل جنگ نہیں ہوتا ،تمام مسائل گفت و شنید سے حل ہوں گے ۔برجیس طاہر کا کہنا تھا کہ ہم معاشی طور پر بہتر ہوں گے تو برابری کی سطح پر دنیا کے ہر ملک سے بات کر سکیں گے ۔انہوں نے تحریک انصاف کی حکومت کی طرف اشارہ دیتے ہوئے کہا کہ سابق حکومت نے پاکستان کو دیوالیہ پن کے قریب پہنچانے کے لیے کوئی کسر نہ چھوڑی، آئی ایم ایف کو لیٹر لکھے گئے کہ پاکستان کی مدد نہ کریں لیکن میاں محمد نواز شریف کی قیادت میں پاکستان گراوٹ سے نکل آیا ہے، اب بات ہوگی تو عوام کی ہوگی ۔
