کمالیہ(این این آئی)پاکستان مسلم لیگ (ن)کے رہنما و امیدوار قومی اسمبلی حلقہ این اے 107میاں زید الرحمن رمدے نے کہا ہے کہ شنگھائی تعاون تنظیم کا پاکستان میں اجلاس اور سربراہی کانفرنس کا انعقاد ملک و قوم کیلئے بڑے اعزاز کی بات ہے ، کانفرنس سے علاقائی ممالک میں معاشی ترقی کو فروغ ملے گا اور باہمی رابطوں میں تیزی آئے گی، شنگھائی تعاون تنظیم کا مقصد رکن ممالک کے درمیان سلامتی، اقتصادی اور سیاسی محاذوں پر تعاون کو فروغ دینا ہے جس سے دیگر ممالک کی طرح پاکستان کو بھی معاشی و اقصادی طورپر زبردست فائدہ حاصل ہوگا۔ان خیالات کا اظہار انہوں نے صحافیوں سے گفتگو کرتے ہوئے کیا۔انہوں نے کہا کہ خطے کے اہم ممالک کے سربراہان کی ملک آمد سے عالمی سطح پر پاکستان کا امیج مزید بہتر ہوا اور ملک کا خوبصورت روشن چہرہ بھی دنیا کے سامنے آیا ہے ۔ پاکستان کیلئے یہ اجلاس ایک منفرد سفارتی موقع ہے بالخصوص ایسے عالمی منظر نامے میں جہاں دنیا بھر کے ممالک اپنے اتحادی اور سٹرٹیجک حکمت عملی تبدیل کر رہے ہیں۔ چین کے ساتھ 14مفاہمتی یاداشتوں پر دستخط بڑی اہم پیشرفت ہے اور گوادر ایئر پورٹ کا ورچوئل افتتاح بھی نیک شگون ہے ۔
